لاہور(ویب ڈیسک) حکومت پیٹرول اور ڈیزل پر کتنی سبسڈی دے رہی ہے؟ اور سبسڈی ختم ہونے سے پیٹرولیم مصنوعات کی قیمتیں کیا ہوں گی؟ تفصیلات سامنے آگئیں۔
وزارت خزانہ کے اپنے اعدادوشمار کے مطابق حکومت اس وقت پیٹرول پر 21 روپے فی لیٹر اور ڈیزل پر 52 روپے فی لیٹر سبسڈی دے رہی ہے۔ اگر حکومت سبسڈی ختم کرتی ہے تو پیٹرول کی نئی قیمت 170 روپے فی لیٹر ہو جائے گی جب کہ ڈیزل پر سبسڈی 196 روپے فی لیٹر ہو جائے گی۔
وزیر خزانہ مفتاح اسماعیل نے کہا ہے کہ اگر حکومت نے مئی اور جون میں پیٹرول اور ڈیزل پر سبسڈی برقرار رکھی تو اس سے قومی خزانے کو 96 ارب روپے کا نقصان ہوگا۔ فیول سبسڈی ختم کرنے کا حتمی فیصلہ وزیر اعظم شہباز شریف کریں گے۔
اس سے قبل وزیر خزانہ مفتاح اسماعیل نے پیٹرولیم مصنوعات کی قیمتوں میں اضافے کا عندیہ دیتے ہوئے کہا تھا کہ آئی ایم ایف حکام سے ملاقات ہوئی ہے۔ آئی ایم ایف پیٹرول پر سبسڈی نہیں چاہتا۔ انہوں نے کہا کہ ہم اس بات پر متفق ہیں کہ جو سبسڈی ہم دے رہے ہیں وہ برداشت نہیں کی جا سکتی اس لیے ان میں کمی ناگزیر ہے۔
وزیر خزانہ مفتاح اسماعیل پاکستان اور انٹرنیشنل مانیٹری فنڈ (آئی ایم ایف) کے درمیان ساتویں اقتصادی جائزے پر بات چیت کے لیے امریکا میں ہیں۔ مذاکرات 20 اپریل کو شروع ہوئے اور کامیاب ہونے کی صورت میں 24 اپریل تک جاری رہنے کا امکان ہے۔ پاکستان کو ایک ارب ڈالر کی قسط ملنے کی توقع ہے۔
