خوبصورت لکھاری برادر افتخار افی کے نام

آجکل کے زمانے میں لوگوں کے خیال میں بڑے لوگ وہ ہوتے ہیں جو پیسے والے ہوں۔لیکن میری نظر میں بڑے وہ لوگ ہیں جو اپنی محنت سے ایک مقام حاصل کرتے ہیں اور دنیا میں اپنا نام بناتے ہیں، لیکن ان کا بڑا پن ادھر تک محدود نہیں رہتا وہ اپنے جیسے لوگوں کی حوصلہ افزائی کرتے ہیں، اِنہی بڑے لوگوں میں ایک بڑا نام برادر افتخار افی کا ہے، جو خود ایک بڑا نام ہونے کے باوجود لوگوں میں بڑا پن پیدا کرنے کی حوصلہ افزائی کرتے ہیں اور اُن کو اپنے تجربات کا نچوڑ بتا کر ان کی رہنمائی کرتے ہیں۔
برادر افتخار افی پاکستانی ادب اور میڈیا کا ایسا حوالہ ہیں جن کا تذکرہ کئے بغیر ہمارے عہد کی تاریخ مکمل نہیں ہوتی۔ ان کا تعارف کروانا تکلف زائد محسوس ہوتا ہے۔ نامہ نگاری، رائٹنگ سکلز، اور ڈرامہ سیریلز کی اگر بات کریں تو برادر افتخار نے ہمارے ملک میں اس صنف کو نا صرف ایک نئی جہت عطا کی ہے بلکہ اسے بام و عروج تک بھی پہنچایا ہے۔ آپ ایک انتہائی مہربان انسان ہیں اور اسی مہربانی کا مظاہرہ کرتے ہوۓ محترم ایم وائے کے نیوز ٹی وی چینل کے آفس میں ہماری دعوت پر رونق آفروز ہوئے۔
برادر افتخار کی رواں اُردو کے کیا کہنے، انکے نستعلیق لہجے میں اُردو الفاظ کی ادائیگی، انکے شاعرانہ ذوق اور انکے کتابی رجحان کی عکاسی کرتی ہے۔ یقین جانئیے ان جیسی مثبت سوچ والی، سادہ لو، حکمت اور دانائی کی طبع سے سرشار شخصیت میں نے آج تک نہیں دیکھی۔ دعا ہے ربِ ذوالجلال برادر افتخار کو ہمیشہ خوش و خرم رکھے اور لوگوں میں انسانیت سیکھانے کا فیض عام کرنے کی مزید توفیق عنایت فرمائے۔
ناچیز: کاشف شہزاد