جان ریمبو، اداکاری کا ایک منفرد ہیرا

پاکستان فلم انڈسٹری کے اداکار ریمبو کسی تعارف کے محتاج نہیں، انہوں نے اپنے فلمی کئیرئیر میں تقریباٙٙ 150 سے زائد فلموں میں کام کیا جن میں زیادہ تر فلمیں سُپر ہٹ ہیں، اسی لئے آپ کو پاکستان کے مشہور ترین اور با اثر اداکاروں میں شمار کیا جاتا ہے۔ اداکار افضل خان المعروف جان ریمبو نوجوان نسل میں انتہائی مقبول اداکار ہونے کے ساتھ ساتھ ایک نامور پروڈیوسر اور بہترین سکرپٹ مصنف ہیں۔ اداکاری کے میدان میں انکا اسٹائل، محنت اور ادب لاجواب ہے۔ آپ پاکستان فلم انڈسٹری کے منفرد شناخت والے بے مثال اداکار ہیں، کیونکہ آپ نے اپنی منفرد شخصیت اور اعلیٰ صلاحیتوں کی بدولت بہت کم عرصے میں بے پناہ شہرت حاصل کر لی تھی۔ آپ جیسے ورسٹائل، بہترین اداکار، آرٹسٹ اور کامیڈین کو مُلک کا بچہ بچہ جانتا ہے مگر انکے اصلی نام سے کچھ لوگ ہی واقف ہوں گے۔ افضل خان 1966 میں راولپنڈی کے ایک متوسط گھرانے میں پیدا ہوئے۔ اِنہوں نے اپنی زندگی کی ابتداء اسٹیج ڈراموں سے شروع کی آپ پی ٹی وی کے زیرِ اہتمام اسلام آباد میں اسٹیج شو کیا کرتے تھے۔ افضل خان المعروف ریمبو کو عروج ڈرامہ سیریل گیسٹ ہاوّس سے ملا یہ ڈرامہ 1991 میں ریلیز ہوا اسی ڈرامہ سیریل سے افضل خان جان ریمبو کے طور پر متعارف ہوئے جو کہ مشہور امریکی اداکار سیلویسٹر سٹالون کا فلمی نام تھا، افضل خان امریکی اداکار سے ایک گونہ مشابہت رکھتے تھے۔ مذکورہ ڈرامہ سیریل کی بدولت ہی عزیزم افضل خان فلموں میں بھی متعارف ہوئے اور فلموں میں انہیں ہدایت کار سعید رانا لیکر آئے جنہوں نے افضل خان کو فلم ہیروّ میں مرکزی کردار کے جوہر دکھانے کا موقع فراہم کیا۔ اس فلم میں ریمبو کے ساتھ انکی موجودہ اہلیہ صاحبہ نے بطور ہیروئن کردار ادا کیا تھا۔ یہ فلم 1992 میں ریلیز ہوئی مگر بد قسمتی سے یہ فلم باکس آفس پر زیادہ دیر نہ چل سکی۔ افضل خان کی وہ فلم جو انہیں ترقی کی عوج پر لے گئی وہ مشہور پنجابی فلم منڈا بگڑا جائے تھی جو 1995 میں ریلیز ہوئی، یہ فلم باکس آفس کے سارے ریکارڈ توڑ کر سُپر ہٹ فلموں میں اپنا نام اُجاگر کر گئی۔افضل خان آج کی نسل میں بھی بے حد مقبول ہیں۔ اُنہوں نے ڈونگی راجہ کو اپنی آواز میں ریکارڈ کروایا جو اب تک اکیس ممالک میں کامیابی کے جھنڈے گاڑ چکی ہے۔ آپ کی اداکاری کے ساتھ ساتھ آپ کی آواز نے بھی فین کو اپنے سحر میں مبتلا کر دیا۔ افضل خان اپنے آپ میں ایک جاندار شخصیت کے حامل انسان ہیں میری ان سے جب گفتو شنید شروع ہوئی تو یقین مانیے پہلی ملاقات کا چنداں احساس نہ تھا اور یوں محسوس ہوا کے ہم کافی عرصہ سے آپس کی اس محفلِ دوراں کا حصہ رہ چکے ہیں۔ اس احساس کو مزید پروان چڑھانے کے لیے یقیناٙ انکی محبت بھری بژلہ سنج شخصیت کا نمایاں کردار ہے۔ افضل خان المعروف جان ریمبو پاکستان کی فلم انڈسٹری کا ایک چمکتا ستارہ ہیں جو اسے دُنیا میں پروموٹ کرنے میں ایک منفرد قد و قامت رکھتے ہیں۔ آپ سے ملاقات باعث مُسرت رہی اور خوشی ہوئی کہ پاکستان میں ایسے آرٹسٹ اور ستارے موجود ہیں جو اپنی منفرد اور سحر انگیز انفرادیت کے ذریعے پاکستان کی فلم انڈسٹری کو اپنی حثیت کی ایک ایسی روشنی اور خدمت دے رہے ہیں جو تاریخ میں اپنی نوعیت کے چند ہی خدمتگاروں کے حصے میں آتی ہے۔ آپ ایک اعلیٰ اخلاق کے مالک، سُلجھے ہوئے کردار کے باوقار انسان ہیں۔ محترم معتدل ذہن کے مالک ، شوق مطالعہ اور ذوق تحریر کے ساتھ ساتھ متحمل طبعیت کے حامل اداکار ہیں۔ دماغ سے سوچنے اور دل سے محنت اور لگن سے کام کرنے والے نایاب لوگوں میں ان کا شمار ہوتا ہے۔ آپ پیشہ وارانہ کمال اور فکر و دانش کے جمال سے مزین دورِ حاضر کی عصری آبرو سمجھے جانے والے انسان ہیں۔ جنہوں نے روشنیوں کے شہر کراچی سے لیکر گلگت تک اپنے فکروفن کی روشنی سے منفرد مقام حاصل کیا ہے۔ ہر کوئی آپ کی ایک سے بڑھ کر ایک اداکاری کا معترف ہے۔ میری آپ سے مُلاقات جن حسین لمحات میں قید ہوئی وہ وقت ہمیشہ یادگار رہے گا۔ میری اللّہ ربُ العزت سے دعا ہے کہ وہ آپکو ہمیشہ شاد رکھے کیونکہ آپ جیسے چمکتے ستارے ہی اپنی تابناک روشنی سے چھوٹے ستاروں کو منور کرنے میں اپنا آپ نچھاور کرتے ہیں۔
بقلم: کاشف شہزاد