کراچی(ویب ڈیسک) شہید ذوالفقار علی بھٹو لاء یونیورسٹی کے وائس چانسلر رانا شمیم کی تقرری کو سندھ ہائی کورٹ میں چیلنج کر دیا گیا ہے۔
سندھ ہائی کورٹ نے درخواست کے قابل سماعت ہونے پر دلائل طلب کر لیے۔
سماعت کے دوران چیف جسٹس سندھ ہائی کورٹ نے استفسار کیا کہ کیا پاکستان کے قوانین گلگت بلتستان پر لاگو ہوتے ہیں؟
درخواست گزار نے موقف اختیار کیا کہ قانون کے مطابق کوئی افسر ریٹائرمنٹ کے بعد 2 سال تک کوئی دوسرا عہدہ نہیں رکھ سکتا۔
درخواست گزار کا مزید کہنا تھا کہ رانا شمیم کی ریٹائرمنٹ کے صرف 6 ماہ بعد وائس چانسلر کے عہدے پر تعیناتی ہوئی۔ رانا شمیم نے خود اپنی تنخواہ 39 لاکھ روپے مقرر کی۔
درخواست گزار نے سپریم کورٹ سے استدعا کی ہے کہ رانا شمیم کو وائس چانسلر کے عہدے سے ہٹایا جائے اور نیب کو انکوائری کا حکم دیا جائے۔
سندھ ہائی کورٹ نے کیس کی مزید سماعت 6 فروری تک ملتوی کردی۔
