وزیر ریلوے حنیف عباسی نے بلوچستان میں ٹرین سروس کی بحالی کا اعلان کرتے ہوئے بتایا کہ جعفر ایکسپریس کل پشاور سے کوئٹہ کے لیے روانہ ہوگی، جبکہ کوئٹہ سے اس سروس کا آغاز جمعہ کے روز کیا جائے گا۔ اس کے علاوہ، کوئٹہ سے کراچی کے درمیان بولان میل کو بھی روزانہ کی بنیاد پر چلانے کا فیصلہ کیا گیا ہے۔
کوئٹہ میں پریس کانفرنس کے دوران وزیر ریلوے نے جعفر ایکسپریس پر ہونے والے حملے کو افسوسناک قرار دیا اور سکیورٹی اداروں کی بروقت کارروائی کو سراہا، جنہوں نے فوری ردعمل دیتے ہوئے خودکش حملہ آوروں کو قابو کیا۔ انہوں نے ریلوے کے عملے اور ٹریک کی بحالی میں حصہ لینے والی ٹیم کو بھی خراج تحسین پیش کیا۔
حنیف عباسی نے اس بات کا اعتراف کیا کہ ریلوے کو سکیورٹی کے متعدد چیلنجز درپیش ہیں، جن میں اسٹیشنوں پر اسکینرز کی عدم دستیابی اور دیگر حفاظتی مسائل شامل ہیں۔ ان چیلنجز سے نمٹنے کے لیے ریلوے پولیس میں 500 اہلکاروں کی تعیناتی کے ساتھ مزید 1000 افراد کی بھرتی کا منصوبہ بنایا گیا ہے۔
وزیر ریلوے نے اس عزم کا اظہار کیا کہ بلوچستان میں چلنے والی ٹرینوں کی تعداد کو 2003-2004 کے دوران چلنے والی سروس کے برابر لایا جائے گا اور مسافروں کو مکمل تحفظ فراہم کیا جائے گا۔
