شہباز شریف نے نگراں وزیراعظم کے لیے تجویز کردہ جسٹس (ر) گلزار احمد کا نام مسترد کر دیا ہے اور اس حوالے سے صدر مملکت کو خط بھی لکھ دیا ہے۔
اے آر وائی نیوز کے مطابق شہباز شریف نے نگراں وزیراعظم کے لیے وزیراعظم عمران خان کی جانب سے تجویز کردہ جسٹس (ر) گلزار احمد کا نام مسترد کرتے ہوئے کہا ہے کہ معاملہ ابھی عدالت میں ہے اس لیے انہیں کارروائی شروع کرنے کا اختیار نہیں۔
اس حوالے سے شہباز شریف نے صدر مملکت کو خط بھی ارسال کیا ہے۔
شہباز شریف نے کہا ہے کہ صدر مملکت ڈاکٹر عارف علوی کی جانب سے نگراں وزیراعظم کے لیے دو خطوط موصول ہوئے تاہم عدالت نے اسپیکر رولنگ کے خلاف نوٹس لے لیا ہے۔
انہوں نے لکھا کہ اس موقع پر نگراں وزیراعظم کی تقرری غیر آئینی اور ناقابل عمل ہے، صدر اور وزیراعظم کا ہر قدم سپریم کورٹ کے فیصلے سے مشروط ہوگا۔
واضح رہے کہ وزیراعظم عمران خان نے قومی اسمبلی کی تحلیل کے بعد نگراں وزیراعظم کے لیے جسٹس (ر) گلزار احمد کا نام تجویز کیا تھا۔
عمران خان نے آئین کے آرٹیکل 224 اے کے تحت نگراں وزیراعظم کی نامزدگی کی۔
اس سے قبل صدر عارف علی نے وزیراعظم عمران خان اور شہباز شریف سے نگراں وزیراعظم نامزد کرنے کا کہا تھا۔
