اسلام آباد (اسٹاف رپورٹر) نیشنل الیکٹرک پاور ریگولیٹری اتھارٹی (نیپرا) نے ملک بھر کے صارفین کے لیے بجلی کی قیمت میں 1 روپے 71 پیسے فی یونٹ کمی کی منظوری دے دی ہے۔ یہ فیصلہ وفاقی حکومت کی جانب سے پٹرولیم لیوی کی مد میں دی گئی رعایت کے تحت کیا گیا ہے۔
ذرائع کے مطابق نیپرا نے حکومت کی جانب سے دی گئی درخواست پر سماعت کے بعد فیصلہ وفاقی حکومت کو بھجوا دیا ہے۔ بجلی کی قیمت میں کمی کا اطلاق اپریل تا جون 2025 کی سہ ماہی کے لیے ہوگا، اور اس کا فائدہ کے الیکٹرک سمیت ملک بھر کے تمام صارفین کو حاصل ہوگا، تاہم لائف لائن صارفین اس کمی سے مستثنیٰ ہوں گے۔
یاد رہے کہ وفاقی حکومت نے نیپرا میں بجلی سستی کرنے کی درخواست جمع کرائی تھی، جس پر 4 اپریل کو باضابطہ سماعت کی گئی۔ حکومت نے حالیہ مہینوں میں پٹرول اور ہائی اسپیڈ ڈیزل پر 10 روپے فی لیٹر تک پٹرولیم لیوی بڑھائی تھی، جس کے بعد عوام کو بجلی کے نرخوں میں کمی کی صورت میں ریلیف فراہم کرنے کا اعلان کیا گیا۔
اس سے قبل بھی سہ ماہی ایڈجسٹمنٹ کے تحت بجلی 1 روپے 90 پیسے فی یونٹ سستی کی گئی تھی۔ علاوہ ازیں، وزیراعظم شہباز شریف نے 3 اپریل کو گھریلو صارفین کے لیے 7 روپے 41 پیسے فی یونٹ جبکہ صنعتی صارفین کے لیے 7 روپے 59 پیسے فی یونٹ کمی کا اعلان کیا تھا۔ اس اعلان کے بعد گھریلو صارفین کے لیے بجلی کا نرخ 38 روپے 37 پیسے جبکہ صنعتی صارفین کے لیے 40 روپے 60 پیسے فی یونٹ مقرر ہوا تھا۔
