اسلام آباد(ویب ڈیسک) وزیراعظم شہباز شریف نے عمران خان کی فول پروف سیکیورٹی یقینی بنانے کا حکم دیتے ہوئے ذاتی نگرانی کا ٹاسک رانا ثناء اللہ کو سونپ دیا۔
تفصیلات کے مطابق وزیراعظم شہباز شریف نے عمران خان کی فول پروف سیکیورٹی یقینی بنانے کا حکم دیتے ہوئے وزارت داخلہ کو سیکیورٹی خطرے کی اطلاع پر فوری ایکشن لینے کی ہدایت کرتے ہوئے رانا ثناء اللہ کو ذاتی نگرانی کا ٹاسک سونپ دیا۔
وزارت داخلہ نے وزیراعظم کے حکم پر کارروائی کی ہے۔ وزارت داخلہ نے چاروں صوبوں، آزاد کشمیر اور جی بی کے ہوم سیکرٹریز کو خطوط لکھے ہیں۔
خط میں عمران خان کو سخت حفاظتی اقدامات کرنے کی ہدایت کی گئی ہے۔
وزارت داخلہ نے آئی جی اور چیف کمشنر اسلام آباد کو بھی ہدایات جاری کرتے ہوئے کہا کہ عمران خان جہاں بھی جائیں سخت سیکیورٹی کو یقینی بنایا جائے۔
وزارت داخلہ نے کہا کہ بنی گالہ رہائش گاہ پر بم ڈسپوزل سمیت دیگر حفاظتی اقدامات کو یقینی بنایا جائے۔
ڈپٹی کمشنر نے مینار پاکستان کے جلسے میں سیکیورٹی خدشات کے پیش نظر پی ٹی آئی قیادت کو خط لکھا تھا جس میں انہوں نے دہشت گردی پر تشویش کا اظہار کرتے ہوئے چیئرمین عمران خان سے ویڈیو لنک کے ذریعے خطاب کرنے کو کہا تھا۔
