اسلام آباد (ویب ڈیسک) وزیر اعظم شہباز شریف سعودی ولی عہد شہزادہ محمد بن سلمان بن عبدالعزیز کی دعوت پر آج سعودی عرب کے تین روزہ دورے پر روانہ ہونگے۔
تفصیلات کے مطابق وزارت عظمی کا منصب سنبھالنے کے بعد شہباز شریف کا یہ پہلا بیرون ملک دورہ ہوگا۔ وزیراعظم سعودی عرب کے تین روزہ سرکاری دورے پر آج مدینہ منورہ پہنچیں گے، ان کے ہمراہ کابینہ اراکین سمیت اعلیٰ سطح کا وفد بھی ہوگا۔
دورے کے دوران وزیراعظم سعودی قیادت کے ساتھ دوطرفہ بات چیت کریں گے جس میں خاص طور پر اقتصادی، تجارتی اور سرمایہ کاری کے تعلقات کو آگے بڑھانے اور سعودی عرب میں پاکستانی افرادی قوت کے لیے زیادہ مواقع پیدا کرنے پر توجہ دی جائے گی۔دونوں فریقین باہمی دلچسپی کے متعدد علاقائی اور بین الاقوامی امور پر بھی تبادلہ خیال کریں گے۔
ایک بیان میں دفتر خارجہ کے ترجمان عاصم افتخار نے کہا کہ پاکستان اور سعودی عرب برادرانہ تعلقات کے پابند ہیں جو باہمی اعتماد اور افہام و تفہیم، قریبی تعاون اور ایک دوسرے کی حمایت کی لازوال روایت پر مبنی ہیں۔پاکستان کے عوام حرمین شریفین کے متولی کو انتہائی عزت کی نگاہ سے دیکھتے ہیں۔
ترجمان نے کہا کہ وزیراعظم کے دورہ سعودی عرب سے دونوں ممالک کے درمیان بڑھتی ہوئی شراکت داری کو مزید تقویت ملے گی۔
ترجمان نے کہا کہ دوطرفہ تعلقات علاقائی اور بین الاقوامی فورمز پر قریبی باہمی تعاون سے مکمل ہوتے ہیں۔
