معیاری تعلیم کی راہ میں مالی رکاوٹیں دور،ہونہار سکالرشپ پروگرام کی رجسٹریشن کا آغاز
لاہور :وزیراعلی پنجاب کی ہدایت پر ہونہار سکالرشپ پروگرام کی رجسٹریشن کا آغاز کر دیا گیا ہے۔ اس پروگرام کے تحت، عالمی جاب مارکیٹ کی ضروریات کے مطابق سالانہ 30 ہزار طلبہ کو 68 مختلف ڈسپلنز میں سکالرشپ فراہم کیے جائیں گے۔
یہ سکالرشپ 50 پبلک سیکٹر یونیورسٹیوں، 16 میڈیکل کالجوں، اور 131 گریجوایٹ کالجوں کے طلبہ کو دیے جائیں گے۔ ہونہار سکالرشپ کا فائدہ اٹھانے والوں میں لمز، فاسٹ، کامسٹ، نیشنل یونیورسٹی آف سائنس اینڈ ٹیکنالوجی (نسٹ)، غلام اسحاق خان انسٹی ٹیوٹ، اور مزید سات اعلیٰ نجی یونیورسٹیز کے طلبہ شامل ہوں گے۔
اس پروگرام کے تحت، آئندہ 8 سالوں میں 130 ارب روپے کی مالی امداد فراہم کی جائے گی، جس کے نتیجے میں آنے والے 4 سالوں میں ایک لاکھ 20 ہزار طلبہ مستفید ہوں گے۔ طلبہ اپنی درخواستیں Honhaarscholarship.punjabhec.gov.pk پر جمع کروا سکتے ہیں۔
اس حوالے سے وزیراعلیٰ مریم نواز شریف نے کہا کہ الحمدللہ میں نے اپنی پہلی تقریر میں ایک اور وعدہ پورا کر دیا ہے۔ ہونہار سکالرشپ پروگرام کا آغاز ایک اہم سنگ میل ہے جو مستحق اور ہونہار طلبہ کے لیے معیاری تعلیم تک رسائی کو یقینی بنائے گا۔
یہ پروگرام اعلیٰ تعلیم کے لیے ذہین طلبہ کی مالی رکاوٹوں کو ختم کرے گا۔ انہوں نے مزید کہا کہ ہونہار سکالرشپ نوجوانوں کے اعلیٰ تعلیم کے خوابوں کو پورا کرنے میں مدد دے گا۔ ہم نوجوانوں کو اعلیٰ تعلیم اور بہترین روزگار فراہم کرنا چاہتے ہیں۔
