حکومت کو طویل عرصے سے 3700 بندسکول کھولنے کا فیصلہ
کوئٹہ :بلوچستان حکومت نے صوبے میں طویل عرصے سے بند پڑے ہوئے 3700 اسکولوں کو دوبارہ کھولنے کا فیصلہ کیا ہے۔ محکمہ تعلیم بلوچستان کے مطابق صوبے کے مختلف اضلاع میں اساتذہ کی کمی کے باعث تقریباً 3700 اسکول سالوں سے بند ہیں۔ سب سے زیادہ اسکول پشین میں ہیں، جہاں 254 اسکولوں پر تالے لگے ہیں، خضدار میں 251 اور کوئٹہ میں 152 اسکول بند ہیں۔
حکام کا کہنا ہے کہ بند اسکولوں کو دوبارہ فعال کرنے کے لیے محکمہ تعلیم کنٹریکٹ پر اساتذہ بھرتی کرے گا اور اس سلسلے میں 11 اکتوبر تک درخواستیں طلب کی گئی ہیں۔ اساتذہ کی بھرتی کے عمل کی نگرانی ہر ضلع کے ڈپٹی کمشنرز کی سربراہی میں کمیٹیاں کریں گی۔
صوبائی حکومت نے پشین اور آواران میں 40 بند اسکولوں کو دوبارہ کھولنے میں کامیابی حاصل کی ہے اور اس کا دائرہ کار دیگر اضلاع تک بڑھایا جائے گا تاکہ تمام بند اسکول دوبارہ فعال ہو سکیں۔
