لاہور(ویب ڈیسک)پاکستان سپر لیگ (پی ایس ایل) سیون میں لاہور قلندرز کے خلاف میچ میں آؤٹ ہونے پر ناراض جیسن روئے پر ضابطہ اخلاق کی خلاف ورزی پر جرمانہ عائد کیا گیا ہے۔
پاکستان کرکٹ بورڈ (پی سی بی) کے مطابق کوئٹہ گلیڈی ایٹرز کے جیسن روئے پر میچ فیس کا 5 فیصد جرمانہ عائد کیا گیا ہے۔
پی سی بی کے مطابق جیسن روئے پر امپائر کے فیصلے پر ردعمل ظاہر کرنے پر جرمانہ عائد کیا گیا ہے۔
یاد رہے کہ جیسن روئے نے پی ایس ایل 7 میں لاہور قلندرز کے خلاف پہلے میچ میں 116 رنز کی دھواں دار اننگز کھیل کر 205 رنز کا ہدف عبور کر کے کوئٹہ گلیڈی ایٹرز کو 7 وکٹوں سے فتح دلائی تھی۔
لیگ کے دوسرے میچ میں جب لاہور قلندرز اور کوئٹہ گلیڈی ایٹرز آمنے سامنے ہوئے تو شاہین آفریدی نے جیسن روئے کو صفر پر آؤٹ کر دیا۔
جیسن روئے نے امپائر کی جانب سے انہیں آؤٹ کرنے کے فیصلے پر سخت ردعمل کا اظہار کیا۔
