لاہور(ویب ڈیسک)پاکستان کرکٹ بورڈ (پی سی بی) نے 24 سال بعد آسٹریلیا کے تاریخی دورہ کو یادگار بنانے کی منصوبہ بندی شروع کر دی ہے۔
ذرائع کے مطابق ٹیسٹ سیریز کے تینوں وینیوز پر اہم شخصیات کو مدعو کیا جائے گا۔ ٹیسٹ سیریز کی اہمیت کو اجاگر کرنے کے لیے اعلیٰ حکومتی شخصیات کو بھی مدعو کیا جائے گا۔
اس حوالے سے ذرائع کا مزید کہنا ہے کہ 24 سال قبل آسٹریلیا کے خلاف ہوم سیریز کھیلنے والے کرکٹرز کو بھی مدعو کیا جائے گا، سابق کرکٹرز کو راولپنڈی، کراچی اور لاہور میں ہونے والے ٹیسٹ میچوں میں مدعو کیا جائے گا۔
ذرائع کا کہنا ہے کہ پاکستان کرکٹ بورڈ جلد ہی تاریخی دورے کے لیے مہم شروع کرے گا۔ پاکستان سپر لیگ (پی ایس ایل) سیون کی وجہ سے تاحال مہم شروع نہیں کی گئی۔
خیال رہے کہ چند روز قبل آسٹریلوی کرکٹ بورڈ نے دورہ پاکستان کے لیے 18 رکنی ٹیسٹ اسکواڈ کا اعلان کیا تھا۔ ٹیم کی قیادت پیٹ کمنز کریں گے جبکہ سٹیو سمتھ نائب کپتان ہوں گے۔
حال ہی میں کرکٹ آسٹریلیا نے بورڈ میٹنگ کے بعد پاکستان کے دورے کی باضابطہ تصدیق کی تھی۔ آسٹریلوی ٹیم 1998 کے بعد پہلی بار پاکستان کا دورہ کر رہی ہے، پی سی بی نے دورے کے نئے شیڈول کا اعلان کیا تھا۔ یہ دورہ اب کراچی کے بجائے پنڈی سے شروع ہو کر پنڈی میں ہی ختم ہوگا۔
آسٹریلوی ٹیم اپنا پہلا ٹیسٹ میچ 4 سے 8 مارچ تک راولپنڈی میں کھیلے گی۔وائٹ بال کے چار میچز لاہور کے بجائے راولپنڈی میں کھیلے جائیں گے۔
کینگروز راولپنڈی میں اپنا آخری ٹی ٹوئنٹی انٹرنیشنل کھیلنے کے بعد 5 اپریل کو وطن واپس آئیں گے۔ یہ تبدیلی یوم پاکستان کی ریہرسل اور لاجسٹک وسائل کو مدنظر رکھتے ہوئے کی گئی ہے۔
دونوں بورڈز نے اتفاق کیا ہے کہ مہمان ٹیم چارٹرڈ فلائٹ سے اسلام آباد پہنچے گی۔ آئسولیشن مکمل کرنے کے بعد انہیں ٹریننگ کی اجازت دی جائے گی۔
