لاہور(ویب ڈیسک) آسٹریلوی کرکٹ ٹیم کا سپن بولنگ کوچ کے بغیر پاکستان آنے کا امکان ہے۔ بھارت سے کوچ سری دھرن سری رام ٹیم کے ساتھ پاکستان نہیں آئیں گے۔
غیر ملکی خبر رساں ادارے کے مطابق آسٹریلوی کرکٹ ٹیم کو دورہ پاکستان کے دوران ماہر اسپن باؤلنگ کوچ کی خدمات حاصل نہیں ہوں گی۔
کرکٹ آسٹریلیا کا کہنا ہے کہ نیوزی لینڈ کے ڈینیل ویٹوری سے بات چیت جاری ہے تاہم وقت کی کمی کے باعث معاملات طے پانا ممکن نہیں۔
خیال رہے کہ چند روز قبل آسٹریلوی کرکٹ بورڈ نے دورہ پاکستان کے لیے 18 رکنی ٹیسٹ اسکواڈ کا اعلان کیا تھا۔ ٹیم کی قیادت پیٹ کمنز کریں گے جبکہ سٹیو سمتھ نائب کپتان ہوں گے۔
حال ہی میں کرکٹ آسٹریلیا نے بورڈ میٹنگ کے بعد پاکستان کے دورے کی باضابطہ تصدیق کی تھی۔ آسٹریلوی ٹیم 1998 کے بعد پہلی بار پاکستان کا دورہ کر رہی ہے، پی سی بی نے دورے کے نئے شیڈول کا اعلان کیا تھا۔ یہ دورہ اب کراچی کے بجائے پنڈی سے شروع ہو کر پنڈی میں ہی ختم ہوگا۔
آسٹریلوی ٹیم اپنا پہلا ٹیسٹ میچ 4 سے 8 مارچ تک راولپنڈی میں کھیلے گی۔وائٹ بال کے چار میچز لاہور کے بجائے راولپنڈی میں کھیلے جائیں گے۔
کینگروز راولپنڈی میں اپنا آخری ٹی ٹوئنٹی انٹرنیشنل کھیلنے کے بعد 5 اپریل کو وطن واپس جائیں گے۔ یہ تبدیلی یوم پاکستان کی ریہرسل اور لاجسٹک وسائل کو مدنظر رکھتے ہوئے کی گئی ہے۔
دونوں بورڈز نے اتفاق کیا ہے کہ مہمان ٹیم چارٹرڈ فلائٹ سے اسلام آباد پہنچے گی۔ آئسولیشن مکمل کرنے کے بعد انہیں ٹریننگ کی اجازت دی جائے گی۔
