ماسکو(ویب ڈیسکؔ) روس نے یوکرین کے دو علاقوں کی آزادی کو تسلیم کر لیا، جن پر یوکرائنی علیحدگی پسندوں کا کنٹرول ہے، روسی صدر نے فوج کو حکم دیا ہے کہ وہ خطے میں امن کی بحالی کے لیے اقدامات کرے۔
بین الاقوامی میڈیا رپورٹس کے مطابق روسی صدر ولادی میر پیوٹن کی تقریر سرکاری ٹیلی ویژن پر نشر کی گئی۔
پیوٹن اور یوکرین کے علیحدگی پسند رہنماؤں نے باہمی امداد کے معاہدوں پر بھی دستخط کیے۔ پیوٹن نے روسی فوج کو حکم دیا کہ وہ خطے میں امن کی بحالی کے لیے اقدامات کرے۔
پوٹن کا کہنا ہے کہ انہوں نے روسی پارلیمنٹ سے کہا ہے کہ وہ جلد از جلد اس کی توثیق کرے۔
دوسری جانب امریکی محکمہ خارجہ کا کہنا ہے کہ روس کا اقدام منسک معاہدوں کی مکمل خلاف ورزی ہے، روس نے یوکرین کی خودمختاری اور علاقائی سالمیت پر حملہ کیا ہے۔
محکمہ خارجہ کے ترجمان نے کہا کہ ہم روسی اقدام کا مناسب اور سخت جواب دیں گے۔
غیر ملکی میڈیا رپورٹس کے مطابق روسی اقدام پر امریکا کی جانب سے سخت اقتصادی پابندیاں متوقع ہیں جب کہ فرانسیسی صدر نے بھی اقوام متحدہ سے اس معاملے پر ہنگامی اجلاس بلانے کی درخواست کی ہے۔
