واشنگٹن (ویب ڈیسک) امریکا نے پاکستان کی سیاسی صورتحال سےلاتعلقی کااعلان کردیا اور کہا عمران خان کے الزامات میں کوئی حقیقت نہیں۔
تفصیلات کے مطابق ترجمان امریکی محکمہ خارجہ کی ترجمان نیڈ پرائس کی جانب سے بیان میں کہا گیا ہے کہ امریکا پرعائد الزامات میں کوئی حقیقت نہیں ، امریکا نے پاکستان کی سیاسی صورتحال پر کوئی خط جاری نہیں کیا۔
نیڈ پرائس کا کہنا تھا کہ وزیر اعظم عمران خان کے بیان پر میرے پاس کہنے کو کچھ نہیں ، پاکستان میں جاری صورتحال کاجائزہ لے رہےہیں اور پاکستان کے آئینی عمل کااحترام کرتے ہیں۔
دوسری جانب وائٹ ہاؤس نے بھی عمران خان کے الزامات کو مسترد کردیا، ترجمان وائٹ ہاؤس جین ساکی نے کہا کہ عمران خان کے الزامات میں کوئی حقیقت نہیں۔
یاد رہے پاکستان نے اندرونی معاملات میں مداخلت پر امریکا سے شدید احتجاج کیا اور قائمقام امریکی ناظم الامور کو دفتر خارجہ طلب کرکے احتجاجی مراسلہ بھی دیا گیا۔
ذرائع نے بتایا تھا کہ قائمقام امریکی ناظم الامور کی طلبی قومی سلامتی کمیٹی کی ہدایت پر کی گئی ہے۔
اس سے قبل قومی سلامتی کمیٹی کے اجلاس میں پاکستان کو دھمکی آمیز خط بھیجنے والے ملک کو بھرپور جوابی ردعمل دینے کا فیصلہ کیا گیا تھا۔
خیال رہے کہ وزیر اعظم عمران خان نے 27 مارچ کو اسلام آباد کے پریڈ گراؤنڈ میں ہونے والے پاکستان تحریک انصاف کے جلسے ”امر بالمعروف“ سے خطاب کے دوران ایک خط لہرایا تھا۔
وزیر اعظم نے خطاب میں کہا تھا کہ پاکستان میں بیرونی مداخلت کی مدد سے حکومتیں تبدیل کی جاتی ہیں، ہمیں بھی ایک ملک نے دھمکی آمیز خط بھیجا ہے۔
