اتر پردیش کے ضلع پریاگ راج جس کا پرانا نام الہ آباد تھا میں نماز جمعہ کے بعد بھارتی حکمراں جماعت بی جے پی کے دو ارکان کی توہین رسالتﷺ بیانات کے خلاف ہونے والے تشدد اور پتھراؤ کے سلسلے میں پولیس نے اب تک 92 لوگوں کو گرفتار کر لیا ہے۔
پولیس نے احتجاج کرنے والے عام شہریوں کے گھروں سے اسلحہ برآمد کرنے کا دعویٰ کیا ہے۔
پولیس کی ایف آئی آر میں 70 افراد کو نامزد کیا گیا ہے اور ان کے خلاف 29 سنگین دفعات میں مقدمات درج کیے گئے ہیں۔
اتوار کو پولیس کی موجودگی میں پریاگ راج ڈیولپمنٹ اتھارٹی نے واقعے کے نامزد مرکزی ملزم جاوید محمد کے گھر کو مکمل طور پر بلڈوز کر دیا۔
اس سے پہلے ان کے گھر پر ایک نوٹس چسپاں کیا گیا تھا جس میں بلڈوزر لگانے کی وجوہات بتائی گئی تھیں۔ اس نوٹس کے مطابق انہیں مکان کی غیر مجاز تعمیر کے معاملے میں 10 مئی کو شوکاز نوٹس جاری کیا گیا تھا، جس کی سماعت 24 مئی کو مقرر کی گئی تھی۔
جیسا کہ پی ڈی اے نے دعویٰ کیا ہے، جاوید محمد یا ان کے وکیل کسی ثبوت اور دستاویزات کے ساتھ پیش نہیں ہوئے۔ اس لیے 25 مئی کو جاوید محمد کو حکم جاری کیا گیا کہ وہ 9 جون تک اپنا گھر گرا دیں۔ چونکہ انہوں نے ایسا نہیں کیا اس لیے انہیں 12 جون کی صبح 11 بجے تک گھر خالی کرنے کا نوٹس دیا گیا اور اس کے بعد اتوار کو پی ڈی اے نے ان کے گھر کو بلڈوز کر دیا۔
ضلع انتظامیہ اور پی ڈی اے کی جانب سے اتوار کو جاوید محمد عرف جاوید پمپ والے نامی شخص کی غیر قانونی تعمیر پر کارروائی کی گئی اور پولیس کی خود ساختہ تفتیش میں اسے پورے واقعے کا ماسٹر مائنڈ سامنے بھی قرار دیا گیا ہے۔ اس دوران، گھر کی بھی چھان بین کی گئی، اور پولیس نے ان کے گھر سے ایک غیر قانونی 12 بور رائفل، 315 بور کی رائفل اور متعدد کارتوس ، جن میں غیر قانونی اسلحہ اور قابل اعتراض پوسٹرز اور کچھ دستاویزات برآمد کرنے کا دعویٰ کیا ہے۔
پولیس کا کہنا ہے کہ ان تمام چیزوں کو شواہد میں شامل کیا جائے گا تاکہ انہیں عدالت میں پیش کیا جا سکے۔
پولیس نے یہ بھی کہا کہ گھر سے کچھ کتابیں، لٹریچر، جھنڈے، پوسٹر، بینر وغیرہ ملے ہیں اور ان سب کی تحقیقات کی جائیں گی کہ یہ کس نے لکھا ہے، کیوں لکھا ہے اور لکھنے والے کی نیت کیا ہے۔
منہدم کیا گیا مکان کس کے نام تھا؟
پی ڈی اے کے نوٹس کے مطابق جاوید محمد کے گھر پر بلڈوزر چلا دیا گیا ہےاور گھر پر چسپاں کیے گئے نوٹس میں جاوید محمد کا نام لکھا گیا تھا۔
لیکن جاوید کے وکلاء نے الہ آباد ہائی کورٹ میں ایک عرضی دی ہے جس میں انہوں نے دعویٰ کیا ہے کہ پی ڈی اے نے جس گھر کو گرایا ہے وہ جاوید محمد کی نہیں بلکہ ان کی اہلیہ پروین فاطمہ کی ملکیت تھا۔ پروین فاطمہ کو یہ گھر اس کے والدین کی جانب سے شادی سے پہلے تحفے کے طور پر ملا تھا۔
وکلا نے اپنی درخواست میں لکھا ہے کہ ‘چونکہ جاوید محمد کی مکان پر کوئی ملکیت نہیں ہے اس لیے انتظامیہ کی جانب سے مکان کو گرانے کا کوئی بھی اقدام قانون کے بنیادی اصولوں کے خلاف ہے اور جاوید محمد کے اہل خانہ کے ساتھ ناانصافی ہے’۔
جاوید محمد کے وکیل کے کے رائے نے الزام لگایا، "مسماری کی کارروائی کو جواز فراہم کرنے کے لیے، 11 جون کو ایک نوٹس گھر پر چسپاں کیا گیا ہے اور پچھلی تاریخ میں دیے گئے شوکاز نوٹس کا ذکر کیا گیا ہے۔ یہ شو کاز نوٹس جاوید محمد یا ان کی اہلیہ پروین کو کبھی نہیں دیا گیا ہے۔”
کے کے رائے اس عرضی کے بارے میں کہتے ہیں، "مسلم پرسنل لاء میں، ایک عورت اپنی موت تک تحفے کے طور پر ملنے والی جائیداد کی واحد مالک ہوتی ہے۔ جائیداد کے معاملے میں ہندو قانون الگ ہے اور مسلم قانون الگ ہے۔ گھر پروین فاطمہ کا ہے اور آپ نے جاوید محمد کو نوٹس دیا ہے، آپ کو بتایا جا رہا ہے کہ یہ جاوید محمد کا گھر نہیں ہے، لیکن آپ نے اس پر توجہ نہیں دی۔
کے کے رائے کا کہنا ہے کہ وہ اس معاملے کے لیے اس وقت تک لڑیں گے جب تک گرائے گئے مکان کو دوبارہ نہیں بنایا جاتا اور اس کے لیے وہ سپریم کورٹ جانے کو تیار ہیں۔
جاوید محمد کون ہیں؟
جاوید محمد کے وکیل اور ان کے قریبی رہنے والے کے کے رائے کا کہنا ہے کہ جاوید طلبہ کی سیاست میں سرگرم تھے۔ جاوید سے اسی وقت سے دوستی ہے۔ ان کا کہنا ہے کہ ایک سال پہلے تک جاوید محمد ان تمام کمیٹیوں میں شامل تھے جو مسلمانوں کے مسائل کے لیے بنائی جاتی ہیں۔
اسے ایک بے داغ آدمی بتاتے ہوئے، کے کے رائے کہتے ہیں، "وہ ضلعی انتظامیہ کے بہت قریبی ساتھی رہے ہیں۔ ایک ایسا شخص جو 20 سال سے عوام کی خدمت کر رہا ہے، جس کے خلاف کسی چھوٹے سے جرم کے خلاف بھی ایف آئی آر درج نہیں ہے، اب اسے مجرمانہ کارروائیوں میں ملوث بنا دیا گیا ہے، صرف ان کے خلاف اور میرے خلاف امن کی خلاف ورزی کا مقدمہ تھا، لیکن انہوں نے تمام تحریکوں میں پر امن طور پر حصہ لیا، انہوں نے ہمیشہ لوگوں کی مدد کی ہے۔ وہ کورونا کی وبا کے دوران بھی لوگوں کی مدد میں مصروف تھے۔
کے کے رائے جاوید محمد کو پریاگ راج انتظامیہ کا عزیز اور محبوب قرار دیتے ہیں۔ ان کے مطابق، "جب بھی پریاگ راج انتظامیہ کو عید، بقرعید، چاند رات اور نماز جمعہ کے دوران مسائل کا سامنا کرنا پڑا اور انہیں خصوصی انتظامات کی ضرورت پڑی، جاوید محمد مدد کرنے میں سب سے آگے تھے۔ وہ اچانک تشدد کا ماسٹر مائنڈ کیسے بن گیا؟ اگر آپ غور کریں تو۔ اسے ماسٹر مائنڈ بنایا گیا ہے، پھر اس کا گھر گرا دیا گیا”۔
کے کے رائے کا کہنا ہے کہ جاوید محمد دہلی کی ویلفیئر پارٹی آف انڈیا سے بھی وابستہ ہیں۔ اور وہ ہمیشہ سے ہی ہندو مسلم اتحادی سیاست کے حامی تھے۔
کے کے رائے کا کہنا ہے کہ وہ پیشے سے دکاندار ہے اور ایک اور دو ہارس پاور کے موٹر پمپ کا کاروبار کرتے ہیں۔
جاوید کی بیٹی آفرین فاطمہ کون ہیں؟
جاوید محمد کی بیٹی آفرین فاطمہ کے بارے میں کے کے رائے نے کہا، "ان کی بیٹی علی گڑھ مسلم یونیورسٹی کے خواتین کالج کی طلبہ یونین کی صدر رہ چکی ہے۔ وہ ٹاپر طالب علم رہی ہے۔ وہ دہلی کی جواہر لال نہرو یونیورسٹی میں طلبہ یونین کی کونسلر منتخب ہوئی ہیں اور اب وہ تحقیق کی طالبہ ہے۔
جب ان کی بیٹی کے خلاف کارروائی کے بارے میں پوچھا گیا تو پریاگ راج کے ایس ایس پی اجے کمار نے کہا، ” ہماری تحقیقاتی ٹیم تشدد کے بعد سے مسلسل کام کر رہی ہے۔ جیسے ہی ثبوت ملیں گے، کارروائی کی جائے گی۔ ثبوت کے بغیر کوئی کارروائی نہیں کی جائے گی ۔”
ہفتہ کو ایس ایس پی اجے کمار کا بیان آیا کہ جاوید محمد سے پوچھ گچھ کے دوران اس نے بتایا کہ ان کی ایک بیٹی ہے جو جے این یو میں پڑھتی ہے اور اپنے والد کو مشورے دیتی رہتی ہے۔
پولیس اس پہلو سے تفتیش کر رہی ہے کہ جاوید کو کیا مشورہ دیا گیا۔ جاوید کے موبائل سے کئی نمبر ملے ہیں جنہیں ڈیلیٹ کر دیا گیا ہے، واٹس ایپ میسجز بھی ڈیلیٹ کر دیے گئے ہیں۔ ان کی بازیابی کے لیے موبائل فرانزک لیب میں بھیجا گیا ہے”۔
اس سوال پر کہ کیا پریاگ راج پولیس جاوید محمد کی بیٹی سے پوچھ گچھ کرے گی، ایس ایس پی اجے کمار نے کہا تھا، "ابتدائی پوچھ گچھ میں کچھ چیزیں سامنے آئی ہیں، دہلی جائیں گے اور اس حوالے سے دہلی پولیس سے درخواست کی جائے گی۔”
مزید بین بین الاقوامی خبریں حاصل کرنے کیلئے اس لنک پر کلک کریں : بین الاقوامی خبریں
