لاہور: لبرٹی چوک میں یوم یکجہتی کشمیر کی تقریب، وزیراعلیٰ مریم نواز نے شمع آزادی روشن کی

لاہور میں محکمہ اطلاعات و ثقافت کے زیر اہتمام لبرٹی چوک میں یوم یکجہتی کشمیر کی خصوصی تقریب منعقد کی گئی۔ وزیراعلیٰ مریم نواز شریف نے تقریب میں شرکت کرتے ہوئے شمع آزادی روشن کی اور شہداء کشمیر کی یادگار پر پھول چڑھا کر نذرانہ عقیدت پیش کیا۔

شرکاء نے علامتی خاموشی اختیار کی، جبکہ وزیراعلیٰ نے شہداء کشمیر کے لیے دعا مغفرت کی۔ تقریب میں مظلوم کشمیری عوام کے حق میں خصوصی دعائیں مانگی گئیں۔ لبرٹی چوک راؤنڈ اباؤٹ پر "دیوارِ شہداء حریت کشمیر” کے نام سے بڑے بل بورڈز نصب کیے گئے۔ کشمیری رہنماؤں اور شہداء کی تصاویر کو سلاخوں کے پیچھے رکھ کر ایک علامتی جیل تخلیق کی گئی، تاکہ بھارتی جبر کو اجاگر کیا جا سکے۔ بھارتی مظالم اور بربریت کے مناظر پر مبنی پینافلیکس بھی چوک کے اطراف آویزاں کیے گئے۔ کشمیر کے حوالے سے ایک خصوصی پکچر وال کی بھی نمائش کی گئی۔ یومِ یکجہتی کشمیر کے موقع پر آئی ایس پی آر کا تیار کردہ خصوصی نغمہ بھی پیش کیا گیا۔

یہ تقریب ملکی تاریخ میں پہلی مرتبہ لاہور کے لبرٹی چوک میں منعقد ہوئی، جس میں کشمیری عوام کے ساتھ بھرپور اظہارِ یکجہتی کیا گیا.