پاکستانی بینک نوٹوں کی نئی سیریز، آرٹ مقابلے کے نتائج منظر عام پر

پاکستانی بینک نوٹوں کی نئی سیریز، آرٹ مقابلے کے نتائج منظر عام پر

کراچی: اسٹیٹ بینک آف پاکستان نے بینک نوٹوں کی نئی سیریز کے لیے منعقد کیے گئے آرٹ مقابلے کے نتائج کا اعلان کر دیا ہے۔ اس مقابلے میں مقامی فنکاروں اور ڈیزائنرز نے بھرپور تخلیقی صلاحیتوں کا مظاہرہ کیا، جس کے بعد بہترین ڈیزائنز کو منتخب کیا گیا۔

بینک دولت پاکستان کے مطابق، مقابلے کا مقصد نئے بینک نوٹوں کی سیریز کے لیے ایسے تخلیقی اور منفرد ڈیزائنز کو منتخب کرنا تھا جو پاکستانی ثقافتی ورثے اور ترقی پسندانہ فکر کی عکاسی کرتے ہوں۔ ججز کمیٹی، جو کہ متعلقہ شعبوں کے ماہرین پر مشتمل تھی، نے مقابلے میں شامل آرٹسٹوں کے ڈیزائنز کا باریک بینی سے جائزہ لیا اور حتمی نتائج کا اعلان کیا۔

مقابلے میں جیتنے والے ڈیزائنز اور آرٹسٹس کے نام مندرجہ ذیل ہیں

ڈاکٹر شیریں عابدی – 10 روپے کے لیے پہلا انعام (NDB031353)مرزا سفیان – 10 روپے کے لیے دوسرا انعام (NDB030720)ہارون خان – 20 روپے کے لیے پہلا انعام (NDB031108)سید فواد حسین – 50 روپے کے لیے پہلا انعام (NDB031393)میمونہ افضل – 100 روپے اور 5000 روپے کے لیے پہلا انعام (NDB031178)ہادیہ حسن – 500 روپے کے لیے پہلا انعام (NDB030815)عینی زہرا – 500 روپے کے لیے دوسرا انعام (NDB031111)نورین اسلم – 1000 روپے کے لیے پہلا انعام (NDB0313148)کریم محمد – 5000 روپے کے لیے دوسرا انعام (NDB031801)

شارٹ لسٹ کیے گئے ڈیزائنز کو بین الاقوامی ڈیزائنرز کے پاس بھیجا جائے گا، جو ان ڈیزائنز کو حتمی شکل دینے کے عمل میں بینک دولت پاکستان کے ساتھ کام کریں گے۔ اگرچہ بین الاقوامی ڈیزائنرز کو مقامی آرٹسٹس کے تخلیق کردہ ڈیزائنز سے رہنمائی ملے گی، لیکن وہ اپنی تخلیقی صلاحیتوں کو بھی بروئے کار لا کر بینک نوٹوں کے حتمی ڈیزائن تیار کریں گے۔

اسٹیٹ بینک آف پاکستان یہ یقینی بنائے گا کہ بینک نوٹوں کی نئی سیریز پاکستانی ثقافت، ورثے، اور ترقی پسندانہ سوچ کی بھرپور عکاسی کرے۔ اس نئے اقدام کا مقصد ملکی ثقافتی ورثے کو جدید تخلیقی انداز میں نمایاں کرنا اور عالمی معیار پر مبنی ڈیزائنز کو عوام کے سامنے لانا ہے۔

مقابلے میں کامیاب ہونے والے آرٹسٹس کو جلد ہی انعامات سے نوازا جائے گا۔ انعامات کی تقسیم کی تقریب کی تاریخ اور مقام کا اعلان جلد کیا جائے گا۔ اسٹیٹ بینک نے مقابلے میں حصہ لینے والے تمام آرٹسٹس کا شکریہ ادا کرتے ہوئے کہا کہ ان کی شرکت نے اس منصوبے کو کامیاب بنانے میں اہم کردار ادا کیا۔