ملک بھر میں یوم تشکر کی تقریبات، پاک افواج کو زبردست خراج تحسین

اسلام آباد (نیوز ڈیسک) بھارت کے خلاف "معرکہ حق” میں تاریخی فتح کے بعد آج ملک بھر میں یوم تشکر منایا جا رہا ہے، جس میں افواج پاکستان کی جرات، مہارت اور دفاعی کامیابی کو زبردست الفاظ میں خراج تحسین پیش کیا جا رہا ہے۔ دن کا آغاز مساجد میں قرآن خوانی اور خصوصی دعاؤں سے ہوا، جبکہ وفاقی دارالحکومت میں 31 اور صوبائی دارالحکومتوں میں 21، 21 توپوں کی سلامی دی گئی۔

پاک فوج کے چاق و چوبند دستوں نے نعرہ تکبیر بلند کرتے ہوئے قومی عزم اور یکجہتی کا مظاہرہ کیا، جبکہ وزیراعظم شہباز شریف نے وزیراعظم ہاؤس میں پرچم کشائی کی اور کہا کہ بھارت کی کھلی جارحیت کے خلاف پاکستان کی شاندار دفاعی کامیابی پر اللہ کا شکر ادا کرنے کے لیے یوم تشکر منایا جا رہا ہے۔ مزار قائد پر ایک پروقار تقریب منعقد ہوئی جس میں کور کمانڈر کراچی لیفٹیننٹ جنرل اویس دستگیر نے حاضری دی، پھول چڑھائے اور مہمانوں کی کتاب میں اپنے تاثرات درج کیے۔ لاہور میں مزار اقبال پر گورنر پنجاب سردار سلیم حیدر نے حاضری دی اور خصوصی دعا کرائی گئی۔

وزیراعلیٰ سندھ مراد علی شاہ نے سندھ سیکرٹریٹ میں اور گورنر خیبرپختونخوا فیصل کریم کنڈی نے گورنر ہاؤس پشاور میں پرچم کشائی کی۔ فیصل کریم کنڈی نے اس موقع پر کہا کہ بھارت ہماری خاموشی کو کمزوری سمجھ رہا تھا لیکن افواج پاکستان نے دشمن کو مؤثر جواب دے کر ثابت کیا کہ پاکستان محفوظ ہاتھوں میں ہے۔ملک کے دیگر حصوں میں بھی یوم تشکر کے سلسلے میں تقریبات منعقد کی گئیں، جن میں کیپٹن محمد سرور شہید، میجر شبیر شریف شہید، میجر محمد اکرم شہید اور کیپٹن کرنل شیر خان شہید کے مزارات پر سلامی اور دعائیہ تقریبات شامل تھیں۔ آزاد کشمیر میں آپریشن "بنیان مرصوص” کی کامیابی پر تعلیمی اداروں میں تقاریب کا انعقاد کیا گیا جہاں اساتذہ، طلبہ اور عوام نے افواج پاکستان کو خراج تحسین پیش کیا اور "پاک فوج زندہ باد” کے فلک شگاف نعرے گونجتے رہے۔