راولپنڈی، اسلام آباد میں موسلادھار بارش سے گرمی کا زور ٹوٹ گیا، موسم خوشگوار

راولپنڈی (ایم وائے کے نیوز ٹی وی) — وفاقی دارالحکومت اسلام آباد اور جڑواں شہر راولپنڈی میں منگل کی صبح ہونے والی موسلادھار بارش نے موسم کو خوشگوار بنا دیا اور کئی روز سے جاری شدید گرمی و حبس کا زور توڑ دیا۔ شہریوں نے موسم کی تبدیلی کو سکھ کا سانس لیتے ہوئے خوشی سے سراہا۔

محکمہ موسمیات کے مطابق اسلام آباد اور راولپنڈی میں بارش کا سلسلہ وقفے وقفے سے جاری ہے۔ شمس آباد میں 15 ملی میٹر اور سید پور کے علاقے میں 27 ملی میٹر بارش ریکارڈ کی گئی۔ بارش کے بعد گرمی میں نمایاں کمی دیکھنے میں آئی جبکہ ہواؤں کے چلنے سے حبس میں بھی خاطر خواہ کمی واقع ہوئی۔

محکمہ واسا راولپنڈی نے بتایا کہ نالہ لئی میں پانی کا بہاؤ تاحال معمول کے مطابق ہے اور کسی بھی ہنگامی صورتِ حال سے نمٹنے کے لیے مکمل تیاریاں کر لی گئی ہیں۔ ادارے کے مطابق نشیبی علاقوں میں عملہ اور نکاسی آب کی مشینری تعینات کر دی گئی ہے جبکہ رین ایمرجنسی بھی نافذ کر دی گئی ہے تاکہ شہریوں کو کسی قسم کی مشکلات کا سامنا نہ کرنا پڑے۔ ادھر کراچی کے علاقوں میں بھی صبح سویرے ہلکی بوندا باندی ہوئی جس سے درجہ حرارت میں معمولی کمی دیکھی گئی، تاہم شہرِ قائد میں ابھی مکمل بارش کی پیش گوئی نہیں کی گئی۔

محکمہ موسمیات کا کہنا ہے کہ آج ملک کے بیشتر علاقوں میں موسم گرم اور شدید حبس رہنے کا امکان ہے۔ تاہم بالائی پنجاب، اسلام آباد، خیبر پختونخوا، گلگت بلتستان اور کشمیر کے چند علاقوں میں آئندہ 24 گھنٹوں کے دوران مزید بارشیں متوقع ہیں، جن سے درجہ حرارت میں کمی کا امکان ہے۔