لاہور: وزیراعلیٰ پنجاب مریم نواز نے اپنی چھت، اپنا گھر اسکیم کے تحت نئی درخواستیں طلب کرنے کی منظوری دے دی۔

لاہور میں وزیراعلیٰ مریم نواز کی زیر صدارت اپنی چھت، اپنا گھر منصوبے سے متعلق اہم اجلاس ہوا، جس میں اسکیم کی پیش رفت کا جائزہ لیا گیا۔ اجلاس کے دوران وزیراعلیٰ نے نئی درخواستیں طلب کرنے کی منظوری دی۔

اجلاس کو بریفنگ میں بتایا گیا کہ اپنی چھت، اپنا گھر پورٹل پر 17 لاکھ سے زائد افراد رجسٹر ہوچکے ہیں، جبکہ اسکیم کے تحت ایک لاکھ 28 ہزار 718 گھر مکمل کیے جاچکے ہیں۔

بریفنگ کے مطابق ایک لاکھ 71 ہزار 597 افراد کو قرض کی دوسری قسط بھی جاری کردی گئی ہے، جبکہ 62 ہزار 600 گھر تیزی سے تکمیل کے مراحل طے کررہے ہیں۔

اجلاس میں مزید بتایا گیا کہ 22 ارب 29 کروڑ روپے کے قرضوں کی اقساط وصول ہوچکی ہیں، جبکہ درخواست دہندگان کو ایک ارب 21 کروڑ 60 لاکھ روپے کے قرضے فراہم کیے گئے ہیں۔