"معاہدہ ابراہیمی کا مقصد مسلم ممالک سے اسرائیل کو تسلیم کرانا ہے” – نجم سیٹھی کا انکشاف

سینئر صحافی اور تجزیہ نگار نجم سیٹھی نے نجی ٹی وی چینل کے ایک پروگرام میں گفتگو کرتے ہوئے انکشاف کیا ہے کہ "معاہدہ ابراہیمی” (Abraham Accords) کا بنیادی مقصد تمام مسلم ممالک سے اسرائیل کو تسلیم کرانا ہے۔ ان کے مطابق اس عالمی منصوبے کے تحت ابتدائی طور پر چار مسلم ممالک کو راضی کیا گیا اور اب باقی ممالک کو بھی آہستہ آہستہ اس صف میں شامل کرنے کی کوشش کی جا رہی ہے، جن میں پاکستان کو بھی اشارے دیے جا چکے ہیں۔

ایم وائے کے نیوز ٹی وی کے مطابق نجم سیٹھی کا کہنا تھا کہ پاکستان کو واضح طور پر یہ پیغام دیا گیا ہے کہ اگر دیگر اسلامی ممالک اسرائیل کو تسلیم کرنے پر راضی ہو جاتے ہیں تو آپ کو بھی تیار رہنا چاہیے، کیونکہ پھر آپ کے لیے بھی کوئی گنجائش باقی نہیں رہے گی۔ ان کے بقول پاکستان کی جانب سے غالباً یہی مؤقف اختیار کیا گیا ہوگا کہ ’’جب وقت آئے گا تو ہم بھی باقی مسلم ممالک کی صف میں کھڑے ہوں گے۔‘‘

نجم سیٹھی نے گفتگو میں مزید کہا کہ ’’اصل پریشانی ہمیں اسرائیل اور بھارت کے بڑھتے ہوئے تعلقات سے ہے۔ دونوں ممالک نہ صرف دفاعی ٹیکنالوجی کا تبادلہ کر رہے ہیں بلکہ ایک دوسرے کو انٹیلیجنس اور عسکری امداد بھی فراہم کر رہے ہیں، جو کہ پاکستان کے لیے ایک اسٹریٹجک چیلنج ہے۔‘‘ انہوں نے انکشاف کیا کہ پاکستان کی ملٹری اسٹیبلشمنٹ ماضی سے ہی اس خواہش کا اظہار کرتی رہی ہے کہ کسی طریقے سے بھارت اور اسرائیل کے درمیان تعلقات کو کمزور کیا جائے کیونکہ ان کا اتحاد پاکستان کی سلامتی کے لیے خطرناک ہے۔

اس حوالے سے نجم سیٹھی کا کہنا تھا کہ ’’اگر سعودی عرب جیسا مرکزی اسلامی ملک اسرائیل کو تسلیم کر لیتا ہے تو پاکستان جیسے ممالک کے لیے ان کے خلاف کھڑا ہونا آسان نہیں ہوگا۔ ایسے میں پاکستان کو بھی عرب بلاک کے ساتھ ہی کھڑے ہونے پر مجبور ہونا پڑے گا۔‘‘ نجم سیٹھی نے مزید کہا کہ اب تو بات یہاں تک آ گئی ہے کہ ’’مزاحمتی تنظیموں‘‘ کو بھی پسِ پردہ پیغام دیا جا رہا ہے کہ وہ بھی مستقبل میں اس تناظر میں خود کو ایڈجسٹ کرنے کے لیے تیار رہیں، کیونکہ ان کی مدد کرنے والے ممالک بھی اگر اسرائیل کو تسلیم کر لیتے ہیں تو ان تنظیموں کے لیے حمایت کا دروازہ بند ہو جائے گا۔ آخر میں نجم سیٹھی نے کہا کہ ’’پاکستان کا اصل مسئلہ فلسطین نہیں بلکہ کشمیر ہے۔ فلسطین کا مسئلہ عرب دنیا کا مسئلہ رہا ہے، اور اگر وہی عرب ممالک اسرائیل کو قبول کر لیتے ہیں تو پاکستان اکیلا کھڑا نہیں ہو سکتا۔ شاید ہم پہلے ہی یہ اشارہ دے چکے ہیں کہ ‘جب وقت آئے گا، ہم بھی تیار ہوں گے۔’‘‘