والدین بننا بھی ایک عظیم رتبہ ہے۔ پاکستانی شوبز انڈسٹری کے معروف ستارے جب اس رتبے پر فائز ہوئے تو اپنی خوشی اپنے مداحوں کے ساتھ شئیر کی۔ عروہ حسین اور فرحان سعید نے اپنے مداحوں کو والدین بننے کی خوشخبری سُنائی۔ اُنہوں نے اپنی ننھی پری کا ہاتھ تھامے ہوئے تصویر انسٹا گرام پر پوسٹ کی۔ دیکھا جا سکتا ہے کہ ایک تصویر میں عروہ اور فرحان نے اپنی بیٹی کو گود میں اُٹھایا ہوا ہے۔
انسٹاگرام پر تصاویر پوسٹ کرتے ہوئے عروہ حسین اور فرحان سعید نے بتایا کہ 3 جنوری 2024 کو اُن کے ہاں ننھی بیٹی کی پیدائش ہوئی ہے۔عروہ حسین اور فرحان سعید نے کہا کہ ہماری خوشی، نعمت اور زندگی کا سب سے قیمتی تحفہ اللہ نے ہمارے لیے بھیج دیا ہے۔ ہم نے ہماری بیٹی کا نام جہاں آرا سعید رکھا ہے، یہ ہماری آنکھوں کا تارا ہے جسے ہم پیارسے آرا کہہ کر پکاریں گے۔
فرحان اور عروہ نے اپنی ننھی پری سے مخاطب ہوتے ہوئے کہا کہ ہماری بیٹی آپ ہمیشہ ہمارے دلوں کی ملکہ رہیں گی، آپ اپنی آمد سے ہمارے لیے ناقابل تصور خوشی لائی ہیں، آپ کی پیدائش کے ساتھ ہمارا بھی دوبارہ جنم ہوا ہے، ہم آپ کے لیے بہترین والدین بنیں گے۔
آخر میں عروہ حسین اور فرحان سعید نے بیٹی کی پیدائش پر اللہ کا شکر ادا کرتے ہوئے اپنی جہاں آرا سعید کے بہتر مستقبل، صحت و تندرستی اور اچھے نصیب کے لیے دُعا بھی کی۔
