لاہور میں 44 سالہ ریکارڈ توڑنے والی شدید بارشیں ہنگامی صورتحال
لاہور میں شدید بارشوں سے 44 سالہ ریکارڈ ٹوٹ گیا، مختلف حادثات میں 2 افراد جاں بحق
لاہور: 1 اگست 2024 کو لاہور میں شدید بارشوں نے 44 سالہ ریکارڈ توڑ دیا، جہاں صبح 9 بجے تک ایئرپورٹ ایریا میں 350 ملی میٹر بارش ریکارڈ کی گئی۔ دو ہفتے قبل تاج پورہ میں 337 ملی میٹر بارش ہوئی تھی۔
لاہور کے مختلف علاقوں میں بھی ریکارڈ توڑ بارش ہوئی۔ نشتر ٹاؤن میں 282 ملی میٹر، اقبال ٹاؤن میں 232 ملی میٹر، پانی والا تالاب میں 226 ملی میٹر، جوہر ٹاؤن میں 222 ملی میٹر، تاج پورہ اور سمن آباد میں 220 ملی میٹر، قرطبہ چوک میں 218 ملی میٹر، ناخدا میں 217 ملی میٹر، فرخ آباد میں 215 ملی میٹر اور گلشن راوی کے علاقے میں زیادہ سے زیادہ 210 ملی میٹر بارش کو ریکارڈ کیا گیا ہے۔
ریسکیو 1122 کے مطابق، بارش کے دوران مختلف حادثات میں 2 افراد جان کی بازی ہار گئے جبکہ 7 دیگر زخمی ہو گئے۔ نشاط کالونی میں کرنٹ لگنے سے ایک شخص جان بحق ہوا اور گھجومتہ میں گھر کی چھت گرنے سے ایک بچی جاں بحق اور 5 افراد زخمی ہوئے۔ جوہر ٹاؤن میں بھی ایک گھر کی چھت گرنے سے 2 افراد زخمی ہوئے۔
ریسکیو اہلکار امدادی کارروائیوں میں مصروف ہیں اور شہر کے مختلف علاقوں میں پانی نکالنے کا کام جاری ہے۔
سوشل میڈیا پر صارفین نے شہر کی صورتحال کی عکاسی کرتے ہوئے بتایا کہ متعدد انڈر پاسز پانی سے بھر گئے ہیں اور گلیوں میں اتنا پانی جمع ہو گیا ہے کہ باہر نکلنا مشکل ہو گیا ہے۔ ایک صارف نے ویڈیو شیئر کرتے ہوئے بتایا کہ سروسز ہسپتال میں بھی پانی داخل ہو گیا ہے، جس سے ہسپتال کی خدمات متاثر ہوئیں۔
حکام نے عوام سے درخواست کی ہے کہ غیر ضروری سفر سے گریز کریں اور احتیاطی تدابیر اپنائیں۔ بارشوں کی شدت کے باعث مزید نقصان سے بچنے کے لیے ریسکیو اور انتظامیہ کے عملے کو الرٹ رکھا گیا ہے۔
