قمر جاوید باجوہ کی سرگرمیوں پر سخت پابندیاں؟ صحافی کے دعوے نے نیا تنازع کھڑا کر دیا
سابق آرمی چیف جنرل (ر) قمر جاوید باجوہ کی حالیہ سرگرمیوں پر سخت نظر رکھی جا رہی ہے، اور ان کی نقل و حرکت پر بھی خصوصی نگرانی جاری ہے۔ ایک معروف مقامی اخبار کے صحافی فاروق اقدس نے اپنے تازہ تجزیے میں دعویٰ کیا ہے کہ جنرل (ر) قمر جاوید باجوہ، جو راولپنڈی کے ایک محفوظ علاقے میں مقیم ہیں، ان کی ملاقاتوں اور نقل و حرکت پر اس قدر سخت نگرانی ہے کہ ایسا محسوس ہوتا ہے جیسے ان کی ملاقاتوں پر پابندی عائد ہے۔
اطلاعات کے مطابق، جنرل (ر) باجوہ طویل عرصے سے منظر عام پر نہیں آئے ہیں، اور ان کی آخری عوامی مصروفیت اپریل میں لاہور میں ایک شادی کی تقریب میں شرکت تھی۔ اس کے بعد سے وہ کسی عوامی یا میڈیا کے سامنے نہیں آئے۔ اس دوران، ان کے بارے میں پھیلنے والی افواہوں اور تنازعات کی وضاحتیں بھی اب ختم ہو چکی ہیں۔
فاروق اقدس کے مطابق، ایک معروف ٹی وی اینکر نے حال ہی میں جنرل (ر) باجوہ سے ملاقات کرنے کی کوشش کی، لیکن سکیورٹی اہلکاروں نے انہیں جنرل باجوہ کے گھر جانے کی اجازت نہیں دی۔ تاہم، مبینہ طور پر جنرل (ر) باجوہ خود اس اینکر کو لینے کے لیے باہر آئے، لیکن ملاقات مختصر رہی اور اینکر کو انٹرویو کرنے کی اجازت نہیں دی گئی۔
یہ صورت حال اس بات کی نشاندہی کرتی ہے کہ سابق آرمی چیف کی سرگرمیوں اور ملاقاتوں پر انتہائی سخت نگرانی کی جا رہی ہے۔
