پاکستان میں منکی پاکس کے کیسز پر ایڈوائزری کا اعلان
عالمی ادارہ صحت نے منکی پاکس کے بڑھتے ہوئے کیسز کے پیش نظر ہیلتھ ایمرجنسی نافذ کر دی ہے۔ پاکستان میں منکی پاکس کے کیسز رپورٹ ہونے کے بعد کراچی میں بھی اس کے ممکنہ خطرات کے پیش نظر ایڈوائزری جاری کی گئی ہے۔ شہر کے نجی اور سرکاری اسپتالوں کے ساتھ ساتھ محکمہ صحت سندھ نے منکی پاکس سے بچاؤ کے لیے انفیکشن کنٹرول الرٹ اور ایڈوائزری جاری کی ہیں، جن میں اس بیماری سے بچنے کے لیے احتیاطی تدابیر اختیار کرنے کی ضرورت پر زور دیا گیا ہے۔
ماہرین کے مطابق، منکی پاکس ایک وائرل انفیکشن ہے جو جانوروں سے انسانوں یا انسان سے انسان میں ایک میٹر کے فاصلے پر پھیل سکتا ہے۔ ابتدائی علامات میں بخار، سر اور پٹھوں میں درد، گلے کی خراش، اور غدود کی سوجن شامل ہیں۔ طبی ماہرین کا کہنا ہے کہ پاکستان میں فی الوقت منکی پاکس سے بچاؤ کے لیے کوئی ویکسین دستیاب نہیں ہے، تاہم چیچک کی ویکسین منکی پاکس سے کچھ حد تک تحفظ فراہم کر سکتی ہے۔
