پی ٹی آئی اسٹبلشمنٹ کو پہلے گالیاں دیتی ہے، پھر پاؤں پڑ جاتی ہے:فیصل واوڈا
سینیٹر فیصل واوڈا نے ایک نجی ٹی وی چینل سے گفتگو کرتے ہوئے پی ٹی آئی اور موجودہ حکومت دونوں کو شدید تنقید کا نشانہ بنایا۔ انہوں نے کہا کہ جو کام پی ٹی آئی نے اسٹبلشمنٹ کے خلاف کیا، وہی حکومت اب کر رہی ہے۔ فیصل واوڈا نے الزام عائد کیا کہ وزیر اعظم اور اسپیکر سمیت حکومت کے دیگر اراکین کو ملک کی حالتِ زار کا علم ہی نہیں، کیونکہ ملک آٹو پر چل رہا ہے۔
فیصل واوڈا کا کہنا تھا کہ پی ٹی آئی کے لوگ پہلے اسٹبلشمنٹ کے خلاف نازیبا الفاظ استعمال کرتے ہیں، پھر جب ان کے حالات خراب ہوتے ہیں تو پاؤں پڑ جاتے ہیں۔ ان کے مطابق اسٹبلشمنٹ کو اب ان لوگوں پر کوئی رحم نہیں کرنا چاہیے۔ انہوں نے علی امین گنڈا پور کی حالیہ سرگرمیوں پر بھی تنقید کرتے ہوئے کہا کہ علی امین لمبی میٹنگ کرکے اسلام آباد سے کیک اور پیسٹری کھا کر چلے گئے ہیں اور اب وہ ایسے بیانات دیتے ہیں جیسے وہ بہت بڑے رہنما ہوں۔
انہوں نے حکومت پر بھی کڑی تنقید کی اور کہا کہ اگر حکومت اپنی خواتین کا دفاع نہیں کر سکتی تو اسے سائیڈ پر ہو جانا چاہیے۔ فیصل واوڈا کا کہنا تھا کہ حکومت نے گرفتاریاں کیں، اور اب اسپیکر اور وزیر اعظم کو کچھ علم نہیں کہ کیا ہو رہا ہے۔ انہوں نے کہا کہ حکومت کو چاہیے کہ جمہوریت اور آمریت کا کھیل نہ کھیلے اور اپنے موقف پر قائم رہے۔
فیصل واوڈا نے مزید کہا کہ بانی پی ٹی آئی کو اس بات کا بخوبی علم تھا کہ کچھ بڑا ہونے والا ہے، اور قانونی و دنیاوی طور پر وہ بانی پی ٹی آئی کو جیل سے باہر آتا ہوا نہیں دیکھ رہے۔ ان کا کہنا تھا کہ جب حکومت نے ایکشن لیا تو وہ غیر جمہوری تھے، اور اب جب گرفتاریاں ہو چکی ہیں تو حکومت خود کو جمہوری قرار دے رہی ہے۔ فیصل واوڈا نے حکومت کو خبردار کیا کہ فوج پر الزام تراشیوں کا کھیل نہ کھیلے، ورنہ نقصان حکومت کو ہی ہوگا۔
