پاکستان میں مہنگائی کی شرح ہماری توقعات سے زیادہ کم ہوئی ہے: وفاقی وزیر خزانہ
اسلام آباد :وفاقی وزیر خزانہ و محصولات سینیٹر محمد اورنگزیب نے کہا ہے کہ پاکستان میں مہنگائی کی شرح ہماری توقعات سے زیادہ کم ہوئی ہے، تاہم پائیدار معاشی استحکام کے لیے ضروری ہے کہ بنیادی اصلاحات کی جائیں۔ اسلام آباد میں پاکستان اکانومی ڈیش بورڈ کی افتتاحی تقریب سے خطاب کرتے ہوئے انہوں نے کہا کہ بینکنگ سیکٹر میں بہتری کی جانب پیش رفت ہو رہی ہے اور حکومت سرمایہ کاروں کو سہولت فراہم کرنے کے لیے ایک پالیسی فریم ورک تشکیل دے رہی ہے۔
سینیٹر محمد اورنگزیب نے کہا کہ ہماری معیشت ترقی کی راہ پر گامزن ہے، اور مہنگائی میں مسلسل کمی ہو رہی ہے۔ انہوں نے مزید کہا کہ اگر بنیادی اصلاحات کی گئیں تو یہ ہمارا آخری آئی ایم ایف پروگرام ہوگا۔ وزیر خزانہ نے ٹیکس ٹو جی ڈی پی شرح کو بڑھانے کی ضرورت پر زور دیتے ہوئے کہا کہ موجودہ معیشت کو استعمال کرتے ہوئے ہمیں ملک میں استحکام لانا ہے۔
اسے بھی پڑھیں پٹرول سستا مگر اشیاء کی قیمتوں میں کمی کیوں نہیں؟
انہوں نے کہا کہ حکومت کی پالیسی کا تسلسل، معاشی استحکام کو برقرار رکھنے میں کلیدی کردار ادا کرے گا۔ ملک میں جاری معاشی استحکام کے ذریعے ہمیں بنیادی اصلاحات کو یقینی بنانا ہوگا تاکہ معیشت کی بحالی کے سفر کو مزید آگے بڑھایا جا سکے۔
محمد اورنگزیب نے پاکستان کے بینکنگ سیکٹر کی بہتری کی جانب اشارہ کرتے ہوئے کہا کہ یہ ایک خوش آئند قدم ہے جو سرمایہ کاری کے مواقع میں اضافے اور ایس ایم ایز کے لیے مالی معاونت کی فراہمی کو یقینی بنائے گا۔ ساتھ ہی، عوام کو بھی بینکاری خدمات تک بہتر رسائی فراہم ہوگی۔
انہوں نے اس بات پر زور دیا کہ پالیسی فریم ورک کا نفاذ بینکوں کو بہتر انداز میں کام کرنے اور سرمایہ کاروں کے اعتماد میں اضافے میں مدد دے گا، جس سے ملک میں سرمایہ کاری کا ماحول مزید سازگار ہوگا۔
مزید برآں، انہوں نے کہا کہ پائیدار معاشی استحکام کے لیے ٹیکس نیٹ کو وسعت دینا، ٹیکس چوری کو روکنا اور مالیاتی ڈسپلن کو یقینی بنانا ضروری ہے تاکہ بیرونی قرضوں کا بوجھ کم کیا جا سکے اور ملکی معیشت کو مضبوط بنیادوں پر استوار کیا جا سکے۔ قوانین کو آسان بنا کر اور سرمایہ کار دوست پالیسیوں کو نافذ کر کے بیرونی سرمایہ کاری کے لیے راہ ہموار کرنا بھی اصلاحات کا ایک اہم حصہ ہے۔
محمد اورنگزیب نے اس بات پر زور دیا کہ ملک کی ترقی کے لیے ان اصلاحات کا نفاذ ضروری ہے اور یہی اقدامات معاشی استحکام کی طویل مدتی ضمانت ہیں۔
