حکومت کا خیبرپختونخوا میں گورنر راج لگانے کا امکان

خیبر پختونخوا میں گورنر راج کے نفاذ کے معاملے میں اہم پیش رفت سامنے آئی ہے۔گزشتہ روز وفاقی کابینہ کے اجلاس میں خیبرپختونخوا میں گورنر راج کے نفاذ پر تفصیلی مشاورت کی گئی۔وزیراعظم شہبازشریف کی سربراہی میں وفاقی کابینہ کا اجلاس ہوا۔حکومتی ذرائع کا کہنا ہے کہ وفاقی کابینہ کی اکثریت نے گورنر راج نافذ کرنے کی حمایت کردی۔ حکومت نے گورنر راج سے پہلے پیپلز پارٹی ،قومی وطن پارٹی اور اے این پی سے مشاورت کا فیصلہ کیا ہے۔وزارت قانون اور اٹارنی جنرل نے بھی گورنر راج لگانے کے حوالے سے وفاقی کابینہ کو اپنی رائے دے دی۔سیاسی اتحادیوں اور دیگر سٹیک ہولڈرز کو اعتماد میں لے کر گورنر راج سے متعلق حتمی فیصلہ کیا جائے گا۔
دوسری جانب پاکستان پیپلز پارٹی کے صوبائی ترجمان امجد آفریدی اور صوبائی صدر محمد علی شاہ نے پشاور پریس کلب میں پریس کانفرنس کرتے ہوئے کہا کہ پاکستان پیپلز پارٹی گورنر راج نہیں چاہتی، پی ٹی آئی چاہتی ہے کہ ایسا کام کریں تاکہ مجبوراً گورنر راج لگایا جائے،صوبائی سرکاری وسائل کے استعمال اور حکومت کے خلاف احتجاج بھی کریں گے۔