وزیراعلیٰ پنجاب مریم نواز کے صاحبزادے جنید صفدر کا رشتہ شریف خاندان میں ہی طے پا گیا ہے۔ بااعتماد ذرائع کے مطابق جنید صفدر کی منگنی 48 سالہ عثمان جاوید کی بیٹی سے طے ہوئی ہے، جو کہ جاوید شفیع کے صاحبزادے ہیں اور سابق وزیراعظم نواز شریف کے فرسٹ کزن ہیں۔
ذرائع نے بتایا کہ جنید صفدر اور ان کی منگیتر کا تعلق لاہور سے ہے، اور رشتے کی بات چیت تقریباً ایک ماہ قبل شروع ہوئی تھی جو اب باقاعدہ طور پر طے پا چکی ہے۔ بدھ کے روز ماڈل ٹاؤن میں واقع شریف فیملی کی رہائش گاہ پر نواز شریف، مریم نواز اور جاوید شفیع سمیت قریبی رشتہ داروں کی ملاقات میں یہ رشتہ طے پایا، جبکہ منگنی اور نکاح کی تقریبات کی تاریخیں جلد طے کی جائیں گی۔
یاد رہے کہ جنید صفدر کی یہ دوسری شادی ہوگی۔ اس سے قبل ان کی شادی قطر میں مقیم معروف بزنس مین سیف الرحمان کی بیٹی عائشہ سیف سے ہوئی تھی، جو 2021 میں لندن کے نائٹس برج کے دی لینزبرو ہال میں انجام پائی تھی۔ تاہم، اکتوبر 2023 میں دونوں نے باہمی رضامندی سے علیحدگی اختیار کر لی تھی۔
جنید صفدر حال ہی میں لندن سے پاکستان واپس آئے ہیں تاکہ اپنی والدہ کی سیاسی سرگرمیوں میں معاونت کر سکیں۔ تعلیمی لحاظ سے جنید ایک شاندار پس منظر رکھتے ہیں۔ انہوں نے برطانیہ کی ممتاز جامعات سے دو بیچلر اور دو ماسٹرز کی ڈگریاں حاصل کی ہیں۔ ان میں 2020 میں لندن اسکول آف اکنامکس سے بین الاقوامی تعلقات میں ماسٹرز، یونیورسٹی کالج لندن سے گلوبل گورننس اینڈ ایتھکس، ڈرہم یونیورسٹی سے سیاست میں فرسٹ کلاس آنرز اور کیمبرج یونیورسٹی سے گریجویشن شامل ہیں۔ جنید صفدر کو پولو کھیلنے کا شوق بھی ہے اور وہ برطانوی یونیورسٹیوں کی نمائندگی کرتے ہوئے کئی پولو مقابلے جیت چکے ہیں۔ ان کی نئی زندگی کی شروعات کے حوالے سے شریف خاندان میں خوشی کی لہر دوڑ گئی ہے۔
