دبئی (ایم وائے کے نیوز) انٹرنیشنل کرکٹ کونسل (آئی سی سی) نے ٹی ٹوئنٹی فارمیٹ کے لیے پلیئرز کی تازہ ترین رینکنگ جاری کر دی ہے، جس میں پاکستانی کرکٹ شائقین کے لیے بری خبر یہ ہے کہ کسی بھی پاکستانی بلے باز یا باؤلر کو ٹاپ 10 میں جگہ نہیں مل سکی۔
بلے بازوں کی فہرست میں آسٹریلیا کے ٹریوس ہیڈ بدستور پہلے نمبر پر فائز ہیں، جب کہ بھارت کے ابھیشیک شرما دوسرے نمبر پر موجود ہیں۔ بھارتی بیٹر تلک ورما ایک درجہ ترقی کے بعد تیسرے اور انگلینڈ کے فل سالٹ ایک درجہ تنزلی کے بعد چوتھے نمبر پر آ گئے ہیں۔ انگلینڈ کے جوز بٹلر کی ایک درجہ ترقی کے بعد وہ پانچویں پوزیشن پر براجمان ہو گئے ہیں، جبکہ بھارت کے سوریا کمار یادو ایک درجہ نیچے چھٹی پوزیشن پر چلے گئے ہیں۔ دیگر نمایاں بیٹرز میں سری لنکا کے پتھم نسانکا ساتویں، نیوزی لینڈ کے ٹِم سائفرٹ آٹھویں، سری لنکا کے کوشل پریرا نویں اور جنوبی افریقہ کے ریزا ہینڈرکس دسویں نمبر پر موجود ہیں۔
پاکستانی بیٹرز میں بابر اعظم 12ویں اور محمد رضوان 13ویں پوزیشن پر بدستور موجود ہیں۔ محمد حارث 30ویں پوزیشن پر برقرار ہیں، جب کہ حسن نواز اور صائم ایوب بالترتیب 47ویں اور 62ویں نمبر پر ایک ایک درجہ تنزلی کے بعد پہنچے ہیں۔ کپتان سلمان آغا دو درجے تنزلی کے بعد 77ویں نمبر پر چلے گئے ہیں۔ بولرز کی فہرست میں بھی پاکستان کو کوئی مقام نہ مل سکا۔ نیوزی لینڈ کے جیکب ڈفی سرفہرست ہیں، جب کہ انگلینڈ کے عادل راشد دو درجہ ترقی کے بعد دوسرے نمبر پر آ گئے ہیں۔ بھارت کے ورون چکرورتی تیسرے، سری لنکا کے ونندو ہسارنگا چوتھے اور ویسٹ انڈیز کے عقیل حسین تین درجہ تنزلی کے بعد پانچویں نمبر پر پہنچ گئے ہیں۔
دیگر بولرز میں آسٹریلیا کے ایڈم زمپا چھٹے، بھارت کے روی بشنوئی ساتویں، سری لنکا کے مہیش ٹھیکشانا آٹھویں، افغانستان کے راشد خان نویں اور بھارت کے ارشدیپ سنگھ دسویں پوزیشن پر موجود ہیں۔ پاکستانی بولرز میں حارث رؤف، عباس آفریدی اور شاہین شاہ آفریدی کی کارکردگی میں معمولی بہتری آئی ہے، اور وہ بالترتیب 19ویں، 20ویں اور 35ویں پوزیشن پر پہنچ گئے ہیں۔
