ملتان ایئرپورٹ: عمرہ ویزے کی آڑ میں انسانی اسمگلنگ کی کوشش ناکام، خاتون سمیت 2 گرفتار
ملتان: ایف آئی اے امیگریشن نے ملتان ایئرپورٹ پر کارروائی کرتے ہوئے عمرہ ویزے کی آڑ میں مبینہ انسانی اسمگلنگ اور کمرشل جنسی استحصال کی کوشش ناکام بنا کر خاتون سمیت 2 مسافروں کو گرفتار کرلیا۔
ایف آئی اے ترجمان کے مطابق دونوں مسافر عمرہ ویزے پر سعودی عرب جانے کے لیے ایئرپورٹ پہنچے تھے، جہاں امیگریشن کلیئرنس کے دوران مشکوک حرکات پر انہیں روک کر پوچھ گچھ کی گئی۔
ترجمان کے مطابق مسافروں کے موبائل فونز، چیٹس اور دیگر ڈیجیٹل مواد کی جانچ کے دوران کمرشل جنسی استحصال سے متعلق مبینہ شواہد سامنے آئے، جبکہ تفتیش کے دوران ایک منظم نیٹ ورک سے متعلق اہم معلومات بھی حاصل ہوئیں۔
ابتدائی تحقیقات کے مطابق ایک ایجنٹ نے عمرہ ویزے کی آڑ میں دونوں مسافروں کے سعودی عرب جانے کے انتظامات کیے تھے، جہاں انہیں مبینہ طور پر کمرشل جنسی استحصال کا نشانہ بنانے کا منصوبہ تھا۔
ایف آئی اے نے مسافروں کے موبائل فونز اور دیگر متعلقہ مواد کو مزید تحقیقات کے لیے تحویل میں لے لیا ہے، جبکہ دونوں مسافروں کو شواہد سمیت ایف آئی اے اینٹی ہیومن ٹریفکنگ سرکل ملتان کے حوالے کردیا گیا۔
ترجمان کے مطابق مبینہ انسانی اسمگلنگ اور کمرشل جنسی استحصال میں ملوث دیگر عناصر کی شناخت کے لیے تحقیقات کا دائرہ وسیع کردیا گیا ہے اور منظم نیٹ ورک میں ملوث تمام افراد کے خلاف قانون کے مطابق کارروائی کی جائے گی۔
