براڈ پیک حادثہ: لاپتا پاکستانی کوہ پیما سہیل سخی کی لاش مل گئی
اسکردو: براڈ پیک پر برفانی تودہ گرنے کے نتیجے میں لاپتا ہونے والے پاکستانی کوہ پیما سہیل سخی کی لاش مل گئی۔
الپائن کلب آف پاکستان کے مطابق شگر کے مقامی رضاکاروں نے اپنی مدد آپ کے تحت سہیل سخی کی لاش تلاش کی۔ لاش تلاش کرنے والے رضاکاروں میں تسر، شگر سے تعلق رکھنے والے محمد ندیم، محمد بشیر اور ابوذر شامل تھے۔
الپائن کلب کے مطابق سہیل سخی کی لاش کیمپ ون سے بیس کیمپ منتقل کردی گئی ہے۔ رضاکاروں نے زمان اور دیگر ساتھیوں کے ہمراہ لاش کو کیمپ ون سے بیس کیمپ پہنچایا۔
الپائن کلب کا کہنا ہے کہ موسم نے اجازت دی تو سہیل سخی کی لاش کو آج ہیلی کاپٹر کے ذریعے اسکردو منتقل کیا جائے گا۔
الپائن کلب آف پاکستان نے سہیل سخی کے اہل خانہ اور کوہ پیمائی برادری سے تعزیت اور ہمدردی کا اظہار کیا ہے۔
واضح رہے کہ تقریباً 15 روز قبل براڈ پیک پر برفانی تودہ گرنے سے 10 کوہ پیما لاپتا ہوگئے تھے، جن میں سے 5 نیپالی کوہ پیماؤں سمیت 7 کوہ پیماؤں کی لاشیں پہلے ہی مل چکی تھیں۔
