کراچی: گھریلو جھگڑے کے دوران شوہر کی مبینہ فائرنگ، بیوی جاں بحق
کراچی کے علاقے سلطان آباد میں گھریلو لڑائی جھگڑے کے دوران مبینہ طور پر شوہر کی فائرنگ سے بیوی جاں بحق ہوگئی۔
پولیس کے مطابق واقعہ ڈاکس تھانے کی حدود میں ایم ٹی خان روڈ پر نجی اسکول کے قریب ایک گھر میں پیش آیا۔ اطلاع ملنے پر پولیس موقع پر پہنچی اور شواہد اکٹھے کرنے کے لیے کرائم سین یونٹ کو طلب کرلیا۔
مقتولہ کی لاش ایمبولینس کے ذریعے سول اسپتال منتقل کی گئی، جہاں اس کی شناخت 48 سالہ زرین بی بی زوجہ شوکت کے نام سے ہوئی۔
ایس ایچ او ڈاکس وقار قیصر کے مطابق ابتدائی معلومات میں سامنے آیا ہے کہ خاتون کو گھریلو جھگڑے کے دوران مبینہ طور پر اس کے شوہر نے فائرنگ کرکے قتل کیا۔
پولیس کے مطابق مقتولہ کا شوہر اسپتال میں موجود ہے، جہاں خاتون کا پوسٹ مارٹم کیا جارہا ہے۔ قانونی کارروائی مکمل ہونے کے بعد شوہر کو حراست میں لیا جائے گا۔
پولیس نے جائے وقوع سے 30 بور پستول کے 2 خول اور ایک پستول قبضے میں لے کر واقعے کی مزید تفتیش شروع کردی ہے۔
