لاہور ریلوے اسٹیشن اور اطراف میں خصوصی صفائی آپریشن شروع
لاہور: ستھرا پنجاب ایجنسی کی ہدایت پر لاہور ویسٹ مینجمنٹ کمپنی (ایل ڈبلیو ایم سی) نے لاہور ریلوے اسٹیشن اور ملحقہ علاقوں میں خصوصی صفائی آپریشن شروع کردیا۔
ایل ڈبلیو ایم سی کے مطابق لاہور ریلوے اسٹیشن اور اس کے اطراف صفائی ستھرائی کے لیے 250 سے زائد ورکرز تعینات کیے گئے ہیں، جبکہ مختلف مقامات پر صفائی کے لیے جدید مشینری بھی استعمال کی جارہی ہے۔
نولکھا، ریلوے روڈ، بادامی باغ اور لاری اڈا میں سویپنگ اور واشنگ کے لیے عملہ اور مشینری تعینات کردی گئی ہے، جبکہ برانڈرتھ روڈ، میکلوڈ روڈ، نکلسن روڈ اور دل محمد روڈ پر بھی خصوصی ٹیمیں صفائی کے انتظامات میں مصروف ہیں۔
ایل ڈبلیو ایم سی کے سی ای او شہریار عارف خان نے کہا کہ شہریوں کو صاف ستھرا ماحول فراہم کرنا اولین ترجیح ہے اور عوامی و رش والے مقامات پر صفائی کے انتظامات مزید بہتر بنائے جارہے ہیں۔
انہوں نے متعلقہ ٹیموں کو صفائی آپریشن مؤثر انداز میں جاری رکھنے اور شہریوں کو صاف ماحول کی فراہمی یقینی بنانے کی ہدایت کی۔
