آزاد جموں و کشمیر پولیس نے کوٹلی میں کارروائی کرتے ہوئے کالعدم تنظیم کے 8 مسلح کارندوں کو گرفتار کرنے کا دعویٰ کیا ہے۔
کوٹلی پولیس حکام نے نیوز کانفرنس کے دوران بتایا کہ گرفتار افراد کے خلاف کارروائی کی گئی ہے، جبکہ ان کے مطابق بعض عناصر نام نہاد پُرامن احتجاج کی آڑ میں حالات خراب کرنے کی کوشش کر رہے ہیں۔
پولیس کا کہنا ہے کہ شرپسند عناصر عوام کی معمولاتِ زندگی کو مفلوج کرنے کی کوششوں میں مصروف ہیں، جبکہ مسلح جتھے کے سرغنہ ریاست میں افراتفری پھیلانے کی کوشش کر رہے ہیں۔
آزاد کشمیر پولیس نے مسلح جتھے کے سرغنہ ایاز بٹ کا مبینہ اعترافی بیان بھی میڈیا کے سامنے پیش کیا۔
پولیس حکام کے مطابق گرفتار افراد سے مزید تفتیش جاری ہے۔
