سونے کی قیمت میں حیران کن کمی

کراچی (ایم وائے کے نیوز ٹی وی) ملک بھر میں سونے کی قیمتوں میں ایک بڑی کمی دیکھنے میں آئی ہے جس سے جیولری مارکیٹ میں ہلچل مچ گئی ہے اور خریداروں میں خوشی کی لہر دوڑ گئی ہے۔ آل پاکستان جیمز اینڈ جیولرز ایسوسی ایشن کے مطابق آج فی تولہ سونے کی قیمت میں 5 ہزار روپے کی کمی ریکارڈ کی گئی، جس کے بعد نئی قیمت 3 لاکھ 51 ہزار روپے ہو گئی ہے۔

ایم وائے کے نیوز ٹی وی کے مطابق نہ صرف فی تولہ بلکہ 10 گرام سونا بھی 4 ہزار 287 روپے سستا ہو کر 3 لاکھ 925 روپے پر آ گیا ہے، جو گزشتہ کئی ہفتوں میں سب سے نمایاں کمیوں میں سے ایک ہے۔ عالمی مارکیٹ میں بھی سونے کی قیمت میں نمایاں کمی دیکھی گئی ہے۔ بین الاقوامی سطح پر سونا 53 ڈالر کمی کے بعد 3290 ڈالر فی اونس پر ٹریڈ ہو رہا ہے، جس کا براہِ راست اثر پاکستانی مارکیٹ پر بھی پڑا۔

تجزیہ کاروں کے مطابق عالمی سطح پر ڈالر کی قدر میں اتار چڑھاؤ، امریکی معاشی پالیسیوں میں تبدیلی اور سرمایہ کاروں کا اعتماد کم ہونے کے باعث سونے کی قیمتوں میں کمی آئی ہے۔ پاکستان میں بھی مقامی سطح پر طلب میں کمی اور کرنسی مارکیٹ کے دباؤ نے سونے کی قیمتوں کو نیچے لانے میں کردار ادا کیا ہے۔