اسلام آباد (ایم وائے کے نیوز) اسلام آباد میں 17 سالہ ٹک ٹاکر ثنا یوسف کے قتل کی تفتیش کے دوران پولیس نے انکشاف کیا ہے کہ ملزم عمر حیات عرف "کاکا” نے مقتولہ سے دوستی کی متعدد کوششیں کیں، جو بار بار مسترد ہونے پر اس نے انتہائی قدم اٹھایا۔
آئی جی اسلام آباد علی ناصر رضوی کے مطابق، ملزم نے ثنا یوسف سے رابطہ کرنے کی کئی بار کوشش کی، لیکن ہر بار انکار کا سامنا کرنے پر اس نے منصوبہ بندی کے تحت قتل کا ارتکاب کیا۔ پولیس نے 113 سی سی ٹی وی کیمروں کی فوٹیجز اور 300 سے زائد فون کالز کا تجزیہ کر کے ملزم کو فیصل آباد سے گرفتار کیا۔ ملزم نے ثنا یوسف کو دو گولیاں مار کر قتل کیا اور موقع سے فرار ہو گیا۔ پولیس نے جدید ٹیکنالوجی کی مدد سے ملزم کو گرفتار کر کے آلہ قتل بھی برآمد کر لیا ہے۔ دوران تفتیش ملزم نے جرم کا اعتراف بھی کر لیا۔
یہ واقعہ سوشل میڈیا پر شدید غم و غصے کا باعث بنا ہے، جہاں صارفین #JusticeForSanaYousaf کے تحت انصاف کا مطالبہ کر رہے ہیں۔ پولیس نے یقین دہانی کرائی ہے کہ ملزم کو قانون کے مطابق سزا دی جائے گی
