پنجاب پولیس نے رحیم یار خان کے کچے کے علاقے میں کامیاب ٹارگیٹڈ آپریشن کرتے ہوئے دو مغوی شہریوں کو باحفاظت بازیاب کرا لیا۔ ترجمان پنجاب پولیس کے مطابق یہ کارروائی ڈی پی او عرفان علی سموں کی قیادت میں تھانہ احمد پور لمہ کی پولیس نے کی۔
آپریشن کے دوران پولیس اور ڈاکوؤں کے درمیان شدید فائرنگ کا تبادلہ ہوا، جس کے نتیجے میں ملزمان مغویوں کو چھوڑ کر فرار ہو گئے۔ پولیس نے کارروائی میں جدید ٹیکنالوجی، بکتر بند گاڑیوں اور ایلیٹ فورس کا استعمال کیا، جبکہ ڈاکوؤں کے ٹھکانوں کو نذر آتش کر دیا گیا۔ ذرائع کے مطابق کچھ ڈاکو زخمی بھی ہوئے تاہم ان کی گرفتاری عمل میں نہیں آ سکی۔ بازیاب ہونے والے مغویوں کی شناخت ضمیر اور رمضان آرائیں کے نام سے ہوئی ہے، جنہیں چند روز قبل نامعلوم مسلح افراد نے اغواء کر کے کچے کے علاقے میں منتقل کیا تھا۔ اغواء کا مقدمہ تھانہ احمد پور لمہ میں درج تھا۔
آئی جی پنجاب ڈاکٹر عثمان انور نے کامیاب آپریشن پر ڈی پی او عرفان علی سموں اور ان کی ٹیم کو شاباش دی اور کہا کہ پنجاب پولیس شہریوں کی جان و مال کے تحفظ کے لیے ہر ممکن اقدامات کر رہی ہے اور جرائم پیشہ عناصر کے خلاف کارروائیاں مزید تیز کی جائیں گی۔