بیمار شوہر کی خدمت کے لیے شوبز چھوڑا، شگفتہ اعجاز

بیمار شوہر کی خدمت کے لیے شوبز چھوڑا، شگفتہ اعجاز

پاکستانی ڈرامہ انڈسٹری کی معروف اور سینئر اداکارہ شگفتہ اعجاز نے انکشاف کیا ہے کہ وہ پچھلے 6 ماہ سے کسی بھی ڈرامے میں کام نہیں کر رہیں، کیوں کہ ان کے شوہر یحیٰ صدیقی شدید بیمار ہیں اور وہ ان کی تیمارداری اور دیکھ بھال میں مصروف ہیں۔ شگفتہ اعجاز کا کہنا ہے کہ ان کے لیے خاندان اور پیارے ہمیشہ ترجیح رہے ہیں اور شوہر کی صحت کی خاطر انہوں نے اپنی مصروف پیشہ ورانہ زندگی سے وقفہ لے لیا ہے۔

حال ہی میں شگفتہ اعجاز نے اپنی شادی کی سالگرہ ہسپتال میں اپنے شوہر کے ساتھ منائی اور اس کا ولاگ یوٹیوب پر شیئر کیا۔ اس ولاگ میں انہوں نے نہ صرف اپنے شوہر کی صحت کی حالت پر بات کی بلکہ اس بات کا بھی ذکر کیا کہ وہ گزشتہ چھ ماہ سے شوبز سے کیوں دور ہیں۔ ان کا کہنا تھا کہ انہیں متعدد ڈراموں میں کام کرنے کی پیشکش ہوئی، لیکن شوہر کی بیماری اور ان کی خدمت کی خاطر انہوں نے ان پیشکشوں کو رد کر دیا۔

شگفتہ اعجاز کا کہنا تھا کہ ان کے لیے ہمیشہ ان کا خاندان اہم رہا ہے اور اسی لیے انہوں نے شوبز سے وقفہ لیا تاکہ وہ مکمل طور پر اپنے شوہر کی تیمارداری کر سکیں۔ ان کا کہنا تھا کہ جب وہ وہی ڈرامے ٹی وی اسکرین پر دیکھتی ہیں جن میں انہیں کام کی پیشکش ہوئی تھی، تو انہیں یاد آتا ہے کہ یہ کردار انہیں بھی دیا گیا تھا، لیکن انہوں نے اپنے شوہر کی خاطر کام کرنے سے انکار کیا۔

شگفتہ اعجاز نے ان دنوں کے بارے میں بھی بات کی جب انہوں نے اپنے قریب ترین لوگوں کو خود سے دور ہوتے دیکھا اور ان حالات میں انہیں بہت کچھ سیکھنے اور سمجھنے کا موقع ملا۔ انہوں نے شوہر کی بیماری اور زندگی کے خاتمے کے بارے میں بھی گفتگو کی۔ ان کا کہنا تھا کہ ہر انسان کو ایک دن چلے جانا ہوتا ہے، لیکن بیماری اور موت کے درمیان جو تکلیف ہوتی ہے، وہ بہت تکلیف دہ ہوتی ہے۔

اداکارہ نے شادی کی سالگرہ کے دن اپنے شوہر کے ردعمل کے بارے میں بات کرتے ہوئے کہا کہ انہیں خوشی ہوئی کہ ان کے شوہر نے انہیں پہچانا، انہیں گلے لگایا اور بچوں کو دیکھ کر مسکرائے، جس سے انہیں بھی سکون ملا۔

یہ بات قابل ذکر ہے کہ شگفتہ اعجاز کے شوہر یحیٰ صدیقی گزشتہ چند ماہ سے کینسر کے علاج کے لیے ہسپتال میں زیرِ علاج ہیں۔ شگفتہ اعجاز نے نہ صرف شادی کی سالگرہ بلکہ بیٹی کی گریجوئیشن کا جشن بھی شوہر کے ساتھ ہسپتال میں منایا تھا۔
شگفتہ اعجاز کا کہنا ہے کہ انہوں نے اپنی زندگی کے بہت قیمتی لمحات اپنے شوہر کے ساتھ ہسپتال میں گزارے، اور انہیں اس پر کوئی افسوس نہیں ہے۔ ان کے نزدیک خاندان اور محبت ہی سب سے زیادہ اہمیت رکھتے ہیں۔ شوبز ان کے لیے اہم ہے، لیکن خاندان ان کے لیے ہمیشہ اولین ترجیح رہا ہے۔