اب میری زندگی تپسیا اور سکون سے جڑی ہے”، ممتا کلکرنی کی کہانی

اب میری زندگی تپسیا اور سکون سے جڑی ہے”، ممتا کلکرنی کی کہانی

ممبئی:بالی ووڈ کی سابقہ مشہور اداکارہ ممتا کلکرنی نے طویل عرصے بعد میڈیا سے بات کرتے ہوئے فلم انڈسٹری میں دوبارہ قدم رکھنے کے امکان کو مسترد کر دیا۔

بھارت واپسی کے بعد دیے گئے انٹرویو میں ممتا کلکرنی نے واضح کیا، "میں بالی ووڈ کے لیے واپس نہیں آئی ہوں اور نہ ہی اداکارہ کے طور پر دوبارہ کام کرنے کا کوئی ارادہ رکھتی ہوں۔”

انہوں نے اپنے سابقہ ساتھی وکی گوسوامی اور ان کے ساتھ جڑے تنازعات پر بات کرتے ہوئے کہا، "اب میرا وکی گوسوامی سے کوئی تعلق نہیں ہے، اور میرا منشیات کی دنیا سے بھی کوئی تعلق نہیں۔ میں ان لوگوں سے کبھی نہیں ملی، ہاں، ماضی میں وکی سے میرا تعلق رہا، لیکن میرا روحانی سفر 1996 میں شروع ہو چکا تھا جب میرے گرو میری زندگی میں آئے۔”

اداکارہ نے مزید بتایا کہ وکی نے ان سے دبئی کی جیل سے رہائی کے دوران رابطہ کیا۔ ممتا کے مطابق، "ان سالوں میں، میں پوجا اور دھیان میں مصروف ہو چکی تھی، اور جب 2012 میں وکی جیل سے باہر آئے تو میری محبت یا شادی کی خواہش ختم ہو چکی تھی۔”

انہوں نے کہا کہ وکی کی رہائی کے باوجود وہ اپنی زندگی کے فیصلے لے چکی تھیں۔ تاہم، انہوں نے عزم کیا تھا کہ وکی کے جیل سے باہر آنے تک بھارت نہیں جائیں گی۔ وکی کینیا چلے گئے، جبکہ ممتا کمبھ کے میلے میں شرکت کے لیے 2012 میں بھارت آئیں اور پھر دوبارہ دبئی واپس چلی گئیں۔

ممتا کلکرنی نے بتایا کہ 2016 میں ان کی وکی سے آخری بار بات ہوئی تھی، اور تب سے ان کا کوئی تعلق نہیں ہے۔ 2016 سے لے کر 2024 تک وہ اپنے روحانی سفر پر مرکوز رہیں اور "تپسیا” میں وقت گزارا۔

یاد رہے کہ ممتا کلکرنی 2000 میں بھارت چھوڑ کر بیرون ملک منتقل ہو گئی تھیں۔ انہوں نے 2012 میں مختصر قیام کے لیے بھارت کا دورہ کیا تھا اور اب 2024 میں اپنی واپسی پر جذباتی نظر آئیں۔

ماضی میں ممتا کلکرنی نے سلمان خان اور شاہ رخ خان جیسے بڑے اداکاروں کے ساتھ فلمیں "کرن ارجن” اور "بازی” میں کام کیا تھا اور بے پناہ شہرت حاصل کی تھی۔