میانداد کے چھکے سے عامر خان کی شادی کیسے خراب ہوئی؟ بھارتی سپر سٹار کا انکشاف

بالی ووڈ کے صفِ اول کے اداکار اور "مسٹر پرفیکشنسٹ” کے لقب سے مشہور عامر خان نے حال ہی میں ایک حیران کن اور دلچسپ انکشاف کیا ہے جس میں ان کی زندگی کے دو اہم واقعات آپس میں جڑ گئے — شادی اور کرکٹ۔

نئی دہلی میں ایک انٹرویو کے دوران عامر خان نے اپنی جوانی کے دنوں کی یادیں تازہ کرتے ہوئے بتایا کہ ان کی شادی کا دن کس طرح جاوید میانداد کے تاریخی چھکے کی وجہ سے ’مایوسی‘ میں تبدیل ہو گیا۔ اداکار کے مطابق وہ 21 سال کی عمر میں رینا دتہ سے محبت میں مبتلا تھے اور دونوں نے اپنے خاندانوں کی مخالفت کے باوجود خاموشی سے شادی کر لی۔ اس وقت ان کے اہل خانہ کو علم تک نہیں ہوا کہ وہ شادی کرنے جا رہے ہیں، کیونکہ اُس دن پاکستان اور بھارت کے درمیان ایک ہائی وولٹیج کرکٹ میچ جاری تھا، جس نے پورے برصغیر کو سحر میں جکڑ رکھا تھا۔

عامر خان کے مطابق یہ وہی میچ تھا جو 10 اپریل 1986 کو شارجہ میں کھیلا گیا تھا۔ اس میچ کے آخری لمحات میں پاکستان کے لیجنڈری بیٹسمین جاوید میانداد نے بھارت کے بولر چیتن شرما کی آخری گیند پر چھکا مار کر پاکستان کو تاریخی فتح دلائی تھی۔ عامر خان نے بتایا کہ جیسے جیسے بھارت جیت کے قریب آ رہا تھا، ان کے جذبات بھی عروج پر تھے اور وہ اس خوشی کو اپنی شادی کے دن کے ساتھ جوڑ کر دیکھ رہے تھے۔ لیکن جیسے ہی جاوید میانداد نے وہ مشہور چھکا مارا، خوشی کا سارا منظر افسوس میں بدل گیا۔

دلچسپ بات یہ ہے کہ بعد میں جب عامر خان کی ایک فلائٹ کے دوران جاوید میانداد سے ملاقات ہوئی تو انہوں نے ہنستے ہوئے میانداد سے شکوہ کیا:
’’جاوید بھائی، آپ نے میری شادی کا دن خراب کر دیا تھا۔ اُس دن میری شادی تھی اور آپ نے چھکا مار کے بھارت کو ہرا دیا!‘‘