کراچی (ایم وائے کے نیوز ٹی وی) – پاکستان کی معروف اداکارہ عنایا خان نے افغان کرکٹ ٹیم کے اسٹار لیگ اسپنر راشد خان سے متعلق ایسا انکشاف کر دیا ہے جس نے مداحوں کو حیران کر دیا۔ انہوں نے نجی ٹی وی کے ایک پروگرام میں گفتگو کرتے ہوئے بتایا کہ راشد خان سوشل میڈیا پر ان سے رابطے میں رہے، تصاویر مانگیں، اور شوبز سے متعلق دلچسپ گفتگو بھی کی۔
عنایا خان نے بتایا کہ ان کا اور راشد خان کا رابطہ سوشل میڈیا پلیٹ فارم اسنیپ چیٹ پر ہوا، جہاں وہ ایک دوسرے کے "ایڈ” میں شامل ہیں۔ اداکارہ کے مطابق دونوں کے درمیان پہلا رابطہ ایک مشترکہ دوست کے ذریعے قائم ہوا، جس کے بعد راشد خان نے خود ان سے بات چیت شروع کی۔ عنایا کے مطابق، راشد خان نے ان سے پوچھا، "کیا آپ اداکارہ ہیں؟” اور کہا کہ ان کی تصاویر دیکھ کر اندازہ ہو رہا ہے کہ وہ شوبز سے وابستہ ہیں۔ اس گفتگو کے دوران راشد خان نے ان سے کچھ تصاویر بھی مانگیں، تاہم عنایا خان نے وضاحت کی کہ یہ رابطہ عمومی نوعیت کا تھا اور اس میں کوئی غیر معمولی بات نہیں تھی۔
انہوں نے مزید بتایا کہ راشد خان اب بھی ان کے اسنیپ چیٹ پر ایڈ ہیں، اور وقتاً فوقتاً خیریت دریافت کرتے ہیں۔ دونوں کے درمیان شوٹنگ سے متعلق موضوعات، شوبز انڈسٹری کے حالات اور یہاں تک کہ پاک بھارت کرکٹ میچز پر بھی تبادلہ خیال ہوتا ہے۔ پروگرام میں گفتگو کے دوران عنایا خان نے اپنے آئیڈیل مرد کی خصوصیات پر بھی روشنی ڈالی۔ ان کا کہنا تھا کہ وہ خاموش طبیعت، سنجیدہ مزاج اور لمبے قد والے افراد کو پسند کرتی ہیں۔ واضح رہے کہ افغان لیگ اسپنر راشد خان نے اکتوبر 2023 میں کابل میں سادگی سے شادی کی تھی۔ ان کی شادی پشتون روایات کے مطابق ہوئی تھی جس میں افغان ٹیم کے کئی موجودہ اور سابق کھلاڑیوں نے بھی شرکت کی، جن میں سابق کپتان محمد نبی بھی شامل تھے۔ شادی کی تصاویر اس وقت سوشل میڈیا پر خوب وائرل ہوئی تھیں اور شائقین نے جوڑے کو خوب دعائیں دی تھیں۔
