بالی ووڈ (ایم وائے کے نیوز ٹی وی)کی مقبول ڈانسر اور اداکارہ شیفالی جریوالا کی اچانک اور افسوسناک موت نے ان کے مداحوں اور شوبز انڈسٹری کو گہرے صدمے میں مبتلا کر دیا ہے، ایسے میں ان کے قریبی دوست اور مشہور اداکار وشال ادیتیا سنگھ نے دل دہلا دینے والا انکشاف کرتے ہوئے اپنی اور شیفالی کی آخری چیٹ کا اسکرین شاٹ سوشل میڈیا پر شیئر کر دیا ہے۔
وشال اور شیفالی، دونوں نے ریئلیٹی شو بگ باس 13 میں ایک ساتھ شرکت کی تھی اور وہ شوبز دنیا کی کئی محفلوں میں اکٹھے نظر آتے رہے۔ ان کے درمیان دوستی کی گہرائی کا اندازہ اس آخری گفتگو سے لگایا جا سکتا ہے جس میں شیفالی نے موت سے چند گھنٹے پہلے وشال کو جمعہ کی رات ملاقات کی تجویز دی تھی۔
وشال کی انسٹاگرام پوسٹ کے مطابق، ان کی یہ گفتگو بدھ 25 جون کی رات 7 بج کر 43 منٹ پر ہوئی تھی، جس میں شیفالی نے کہا: "ہم جمعہ کو چلتے ہیں، آج کوئی بھی جگہ جانے کے قابل نہیں ہے”۔ جس پر وشال نے جواب دیا کہ وہ جمعہ کی شب 10 بجے ملنے کے لیے تیار ہیں۔ بدقسمتی سے، ملاقات کی یہ تاریخ شیفالی کی زندگی کا اختتام ثابت ہوئی، کیونکہ وہ جمعہ 27 جون کی شب دنیا سے رخصت ہو گئیں۔
شیفالی جریوالا کی موت کی خبر جمعہ کی شب میڈیا پر گردش کرنے لگی، ابتدائی اطلاعات کے مطابق انہیں دل کا دورہ پڑا، تاہم ممبئی پولیس کے مطابق حتمی وجہ پوسٹ مارٹم رپورٹ کے بعد ہی سامنے آ سکے گی۔ ان کے شوہر اور قریبی دوست فوری طور پر انہیں اسپتال لے کر پہنچے، مگر ڈاکٹروں نے تصدیق کی کہ وہ پہلے ہی دم توڑ چکی تھیں۔
یاد رہے کہ شیفالی جریوالا نے 2002 میں ‘کانٹا لگا’ گانے کی ویڈیو میں اپنی جاندار پرفارمنس سے شہرت حاصل کی تھی، جس کے بعد وہ نچ بلیے، بگ باس اور دیگر کئی ٹی وی شوز کا حصہ رہیں۔ ان کا کیریئر اگرچہ مختصر تھا لیکن ان کی موجودگی نے ہر جگہ رنگ بھر دیے۔
