نیلی آنکھوں والے لوگ کون سی نسل سے ہیں؟

نیلی آنکھوں والے لوگ کون سی نسل سے ہیں؟

لندن: ایک نئی تحقیق میں سائنسدانوں نے یہ حیرت انگیز دعویٰ کیا ہے کہ نیلی آنکھوں والے تمام افراد کی نسل ایک ہی یورپی شخص سے ہے جو 6000 سے 10000 سال قبل زندہ تھا۔ یہ دریافت انسانوں کی آنکھوں کی رنگت میں تبدیلی کی ایک دلچسپ جھلک پیش کرتی ہے۔
ابتدائی طور پر انسانی تاریخ میں صرف بھوری آنکھیں ہی موجود تھیں مگر ایک مخصوص جینیاتی تبدیلی نے آنکھوں کی رنگت میں ہمیشہ کے لئے تبدیلی کا آغاز کیا۔ تحقیق کے مطابق یہ تبدیلی ایک خاص جین HERC2 کی وجہ سے آئی ہے جو OCA2 نامی جین کو غیر فعال کر دیتا ہے۔ OCA2 وہ جین ہے جو ہماری آنکھوں کی رنگت کے بھورے پن کا تعین کرتا ہے۔
HERC2 جین کی تبدیلی کے باعث نیلی آنکھوں کی خصوصیت سامنے آئی۔ سائنسدانوں نے مزید تحقیقات کے ذریعے معلوم کیا کہ نیلی آنکھوں والے تمام افراد میں ایک ہی جینیاتی تغیر پایا جاتا ہے جو کہ یہ ثابت کرتا ہے کہ ان سب کی نسل ایک ہی شخص سے ہے۔
حالیہ تحقیق کے مطابق دنیا کی صرف 8 سے 10 فیصد آبادی نیلی آنکھوں کی حامل ہے، جو کہ ایک منفرد جینیاتی خصوصیت ہے۔ یہ دریافت انسانی جینوم کی پیچیدگیوں اور ارتقاء کے مراحل کے بارے میں نئی معلومات فراہم کرتی ہے۔
اس تحقیق کی تفصیلات مختلف سائنسی جریدوں میں شائع کی گئی ہیں اور اس نے آنکھوں کی رنگت کی جینیاتی بنیادوں کو سمجھنے میں اہم کردار ادا کیا ہے۔