ڈی آئی خان: ججز کے اسکواڈ پر فائرنگ، دو پولیس اہلکار شہید
ڈی آئی خان :ڈی آئی خان میں ججز کے اسکواڈ پر فائرنگ کے دلخراش واقعے میں دو پولیس اہلکار شہید ہو گئے۔ تفصیلات کے مطابق، یہ واقعہ ٹانک بھگوال پٹرول پمپ کے قریب پیش آیا جہاں نامعلوم حملہ آوروں نے ججز کے اسکواڈ پر حملہ کیا۔
فائرنگ کے اس تبادلے میں خوش قسمتی سے تینوں ججز محفوظ رہے، تاہم پولیس کے دو اہلکار، عبداللہ اور صمد، فائرنگ کے دوران شہید ہو گئے۔ حملہ آوروں نے جائے وقوع سے فرار کے دوران ایک ڈبل کیبن گاڑی بھی اپنے ساتھ لے لی۔
ڈی ایس پی حافظ محمد عدنان نے بتایا کہ حملہ ٹانک سے آنے والے ججز کے اسکواڈ پر کیا گیا، جس کے نتیجے میں ججز کی سیکیورٹی پر مامور دو محافظ جان سے گئے۔ انہوں نے مزید کہا کہ واقعے کے بعد علاقے کا محاصرہ کر لیا گیا ہے اور ملزمان کی تلاش کے لیے کارروائی شروع کر دی گئی ہے۔
