پنجاب میں موٹر سائیکل لائسنس کیلئے 42 روز کالرنر پیریڈ ختم

پنجاب میں موٹر سائیکل لائسنس کیلئے 42 روز کالرنر پیریڈ ختم

لاہور: وزیراعلیٰ پنجاب کے حکم پر پنجاب بھر میں موٹر سائیکل لائسنس کے حصول کے عمل کو مزید آسان بنا دیا گیا ہے۔ نئے احکامات کے تحت اب شہریوں کو لرنر پرمٹ کے بعد 42 دنوں کا انتظار نہیں کرنا پڑے گا، بلکہ لرنر پرمٹ حاصل کرنے کے فوراً بعد ہی وہ لائسنس کے لیے ٹیسٹ دے سکیں گے اور موٹر سائیکل لائسنس حاصل کر سکیں گے۔اس حوالے سے سی ٹی او لاہور، عمارہ اطہر نے بیان دیتے ہوئے کہا کہ موٹر سائیکل لائسنس کے حصول کے لیے شہری اب ایک، دو یا پانچ سال کی مدت کے لیے لائسنس بنوا سکتے ہیں۔

انہوں نے مزید کہا کہ اس عمل میں شفافیت کو یقینی بنانے کے لیے لائسنس سینٹرز میں کیش ہینڈلنگ کو مکمل طور پر ختم کر دیا گیا ہے، اور لائسنس کے تمام مراحل کی آڈیو اور ویڈیو ریکارڈنگ بھی کی جائے گی۔عمارہ اطہر نے شہریوں کو ہدایت کی کہ وہ لائسنس کے حصول کے لیے صرف اپنا شناختی کارڈ ساتھ لے کر آئیں۔ ان کا کہنا تھا کہ اس نئی پالیسی کا مقصد شہریوں کے قیمتی وقت کو محفوظ بنانا اور قانون کی پاسداری کو فروغ دینا ہے۔

مزید برآں، سی ٹی او نے بتایا کہ بغیر لائسنس ڈرائیونگ کرنے پر 2 ہزار روپے جرمانہ عائد کیا جائے گا۔ انہوں نے کہا کہ اس نئے اقدام سے شہریوں کو لائسنس حاصل کرنے میں آسانی ہوگی اور وہ قانون کے دائرے میں رہتے ہوئے اپنی ڈرائیونگ جاری رکھ سکیں گے