لاہورمیں طوفانی بارش، نشیبی علاقے زیر آب، بجلی کا نظام درہم برہم

لاہورمیں طوفانی بارش، نشیبی علاقے زیر آب، بجلی کا نظام درہم برہم

لاہور: صوبائی دارالحکومت لاہور سمیت پنجاب کے مختلف اضلاع میں حالیہ طوفانی بارشوں نے زندگی کو مفلوج کر دیا ہے۔ نشیبی علاقے زیر آب آ گئے ہیں اور بجلی کا نظام درہم برہم ہو گیا ہے۔
لاہور کے مختلف علاقوں میں موسلا دھار بارش کے نتیجے میں مسلم ٹائون، جوہر ٹائون، کلمہ چوک، مزنگ اور بھاٹی کی سڑکیں اور گلیاں ندی نالوں میں تبدیل ہو گئیں۔ سب سے زیادہ 201 ملی میٹر بارش نشتر ٹائون میں ریکارڈ کی گئی ۔گلشن راوی 91 ملی میٹر، گلبرگ 86 ملی میٹر اور لکشمی چوک میں 82 ملی میٹر بارش ریکارڈ ہوئی۔
بارش کے نتیجے میں فیڈرز ٹرپ ہونے سے بجلی کا نظام شدید متاثر ہوا۔ فیصل آباد، شیخوپورہ، سیالکوٹ، اور سرگودھا سمیت پنجاب کے متعدد علاقوں میں بجلی کی فراہمی معطل ہو گئی جس کی وجہ سے شہری شدید مشکلات سے دوچار ہوئے۔
وزیراعلی پنجاب کی ہدایت پر، ایم ڈی واسا نے کمشنر لاہور کے ہمراہ شہر کے مختلف علاقوں کا دورہ کیا۔ انہوں نے بتایا کہ بارش کے پانی کی نکاسی اور دیگر مسائل کے حل کے لیے اقدامات کیے جا رہے ہیں۔
پنجاب کے مختلف اضلاع میں بھی بارش کے باعث سیلابی صورتحال پیدا ہو گئی ہے۔ متعدد سڑکیں بند ہو گئی ہیں اور عوام کو مشکلات کا سامنا کرنا پڑ رہا ہے۔ بارشوں کے بعد کی صفائی اور مرمت کے کام میں سرعت لانے کی ضرورت ہے تاکہ زندگی جلد معمول پر آ سکے۔