ملک میں شرح خواندگی کی رپورٹ سینٹ میں پیش کی گئی، پیش کردہ رپورٹ کے مطابق بلوچستان میں شرح خواندگی سب سے کم ہے۔ پاکستان میں دس سال اور زائد عمر کے افراد کی شرح خواندگی سے متعلق معاشی سروے برائے 2022 تا 2023 سینیٹ اجلاس میں پیش کیا گیا۔ اجلاس میں وزارت تعلیم کی جانب سے دیے گئے جواب میں دعوی کیا گیا ہے کہ پاکستان میں مجموعی طور پر شرح خواندگی 62.8 فیصد ہے۔
سینٹ میں پیش کردہ رپورٹ میں وزارت تعلیم کے تحریری جواب کے مطابق صوبوں میں سب سے کم شرح خواندگی بلوچستان میں ہے، جو کہ 54.5 فیصد ہے۔ پنجاب میں شرح خواندگی صوبوں میں سب سے زیادہ 66 عشاریہ 3 فیصد ہے۔ سندھ میں شرح خواندگی 61 عشاریہ 8 فیصد، خیبرپختونخوا میں شرح خواندگی 55 عشاریہ 1 فیصد ہے۔
دستاویز کے مطابق ملک بھر میں خواتین کی شرح خواندگی 51 عشاریہ 9 فیصد ، جبکہ مردوں کی شرح خواندگی خواتین سے زیادہ 73 عشاریہ 4 فیصد تک رہی ہے۔ بتایا گیا ہے کہ خواتین میں سب سے کم شرح خواندگی بلوچستان میں 36 عشاریہ 8 فیصد ہے، خیبرپختونخوا میں 37 عشاریہ 4 فیصد ہے، سندھ میں 49 عشاریہ 7 فیصد ہے جب کہ پنجاب میں خواتین کی شرح خواندگی 58 عشاریہ 4 فیصد رہی ہے۔
تمام صوبوں کا الگ الگ اعدادوشمار کے ساتھ ڈیٹا دیکھا جائے تو رپورٹ میں پیش کردہ اعدادوشمار کے مطابق صوبہ پنجاب میں شرح خواندگی کی فیصد باقی صوبوں سے بہتر ہے۔
